आजदेखि हिमालयन र सिभिल बैंकको एकीकृत कारोबार सुरु, कुल पुँजी ३४ अर्ब पुग्यो
वि.सं.२०७९ फागुन १२ शुक्रवार
काठमाडौं । हिमालयन बैंक र सिभिल बैंकले आजदेखि एकीकृत कारोबार सुरु हुने भएको छ ।
हिमालयनले आजदेखि सिभिल बैंकलाई प्राप्ति गरी एकीकृत कारोबार गर्न लागेको हो ।
नेपाल राष्ट्र बैंकले फागुन ५ गते सिभिल बैंकलाई प्राप्ति (एक्विजिशन) गरी गरेर ‘हिमालयन बैंक लिमिटेड’ को नाममा एकिकृत कारोबार गर्न स्वीकृति दिइसकेको छ ।
बैंकको कार्यालय हाल हिमालयन बैंकको रजिष्टर्ड कार्यालय रहेको स्थान कमलादी, काठमाडौंमा रहनेछ ।यी दुवै बैंकबीच १ः८०.२८ स्वाप रेसियामा मर्जरमा जाने सहमति भएको हो । सिभिल बैंकको १०० कित्ता सेयर हुने सेयरधनीहरुले हिमालयन बैंकको ८० कित्ता सेयर पाउने छन् ।
एकीकृत कारोबार भएसगै बैंकको कुल पुँजी ३४ अर्ब रुपैयाँ, चुक्ता पुँजी २१ अर्ब ६५ करोड रुपैयाँ कायम भएको छ ।
कुल निक्षेप २ खर्ब ७४ अर्ब, कुल कर्जा २ खर्ब ५० अर्ब पुग्ने छ । यस्तै शाखा सञ्जाल १८९ वटा पुग्नेछन् ।
प्रकाशित समय : ११:३३ बजे
