काठमाडौं । महिन्द्रा प्यासेन्जर कार तथा पिकअपको नेपालका लागि आधिकारिक वितरक अग्नि इन्कर्पोरेटेडले स्कर्पियो र बोलेरो रेन्जका सवारी साधनमा पहिलो पटक ७० प्रतिशतसम्म फाइनान्सिङ स्किम ल्याएको छ ।

यो योजना ग्राहकहरूलाई राहत दिन र महिन्द्रा भेहिकलले विगतका वर्षहरूमा देखाएको उद्यमशीलताको भावनालाई सहयोग गर्ने प्रयास स्वरुप ल्याइएको कम्पनीले बताएको छ ।

बजारको वर्तमान आर्थिक अवस्थालाई ध्यानमा राख्दै व्यवसाय गर्ने योजना बनाइरहेका उद्यमीहरूलाई सहयोग गर्न कम्पनीले यस्तो योजना ल्याएको हो ।

अग्नि इन्कर्पोरेटेडले यस योजनाका लागि अग्नि हायर पर्चेजसँग सम्झौता गरेको छ । यो स्किमले आफ्ना ग्राहकहरूलाई झण्झटरहित फाइनान्सिङ सेवा प्रदान गर्न र उनीहरूलाई गर्वका साथ महिन्द्रा सवारी साधनको मालिक बन्न सहज तुल्याउने विश्वास लिइएको छ ।

“हामी एकल प्रक्रिया (वान विन्डो अप्रोच)का साथ हाम्रा ग्राहकहरुका लागि समग्र प्रक्रियालाई सहज र सरल बनाउन चाहन्छौं, त्यसैले हामीले हाम्रो आन्तरिक समूह कम्पनीसँग मिलेर यसमा काम गरेका छौं,” कम्पनीले भनेको छ, सहज कागजात र प्रक्रियाहरू पूरा गरेर ग्राहकले आवेदन दिएको ७ कार्य दिनभित्र कर्जा सुविधा प्राप्त गर्न सक्नेछन् ।

यो स्किम अन्तर्गत ग्राहकले कम्पनीको नाममा खरिद गर्न चाहँदा ७० प्रतिशतसम्म र व्यक्तिगत खरिदकर्ताका लागि ५० प्रतिशतसम्म फाइनान्स सेवा पाउनेछन् ।

फाइनान्सिङको अधिकतम अवधि ५ वर्षसम्मको हुने र यसका लागि ग्राहकले ३० प्रतिशत रकम डाउन पेमेन्ट गर्नुपर्नेछ । यो योजना नेपालभर लागू हुने कम्पनीको भनाई छ ।