काठमाडौं। रामेछापको मन्थली नगरपालिका–६ मा दलित महिलालाई बन्धक बनाएर यातना दिइएको छ । दही चोरेको आरोपमा मन्थली नगरपालिकाकी १२ वर्षीया बालिकालाई स्थानीय चिउरीपानीका ६३ वर्षीय शेरबहादुर श्रेष्ठको परिवारले यातना दिएका हुन् ।

मंगलबार दिउँसो बालिकाको उद्दार गरिएको रामेछापका डिएसपी राजकुमार थिङले  बताए । फागुन ३० मा दिउँसो साढे ४ बजेबाट बालिकालाई दलानको थाममा बाँधेर श्रेष्ठ परिवारले यातना दिएका हुन् ।

बालिका बन्धक बनाउने शेरबहादुर श्रेष्ठलाई प्रहरीले पक्राउ गरेको छ ।

पीडित परिवारले श्रेष्ठविरुद्ध अपहरण गरेर शरीर बन्धक बनाएको कसुरमा जाहेरी दिएका छन् । जाहेरी दर्ता गरेर अनुसन्धान अघि बढाएको डिएसपी थिङले जानकारी दिए ।

मन्थली नगरपालिका–६ चिउरीपानीस्थित श्रेष्ठको घरबाट प्रहरीले बालिकालाई उद्दार गरेर सदरमुकाममा ल्याएको थियो ।

हरीको टोलि घटनास्थल पुगेर बालिकाको उद्धार गरेको हो । ‘बालिकालाई उद्धार गरेर स्वास्थ्य परीक्षण गर्न पठाएका छौँ,’ जिल्ला प्रहरी कार्यालय रामेछापका प्रहरी नायब उपरीक्षक राजकुमार थिङले भने, ‘श्रेष्ठलाई नियन्त्रणमा लिएर अनुसन्धान गरिरहेका छौँ ।’

बालिकालाई आइतबार बिहान बाँधेर राखेका श्रेष्ठले नछोडेपछि वडाध्यक्ष गोपाल माझीले सोमबार जिल्ला प्रहरी कार्यालय गुहारेका थिए ।

‘वडासदस्य र बालिका पढ्ने विद्यालयका प्रधानाध्यापकले समेत बालिकालाई छोड्न आग्रह गरेका थिए । तर श्रेष्ठले बालिकालाई नछोडेपछि प्रहरीलाई खबर गरेको हो,’ वडाध्यक्ष माझीले भने । माझीका अनुसार श्रेष्ठले बालिकालाई २० घण्टासम्म थाममा बाँधेर यातना दिएका थिए ।