काठमाडौं । अरुण भ्याली हाइड्रोपावर कम्पनीको नाफामा गिरावट देखिएको छ । एकै वर्ष कम्पनीको खुद नाफा साढे ८८ प्रतिशत घटेको छ।

कम्पनीले मंगलबार प्रकाशन गरेको गत आर्थिक वर्ष २०८०-८१ को चौंथो त्रैमासिक वित्तीय विवरणले यस्तो देखाएको छ ।

अघिल्लो आवमा कम्पनीले ५ करोड ८ लाख ४६ हजार रुपैयाँ खुद नाफा कमाएको थियो । तर, गत आवमा आइपुग्दा भने ८८.४३ प्रतिशत घटेर ५८ लाख ८४ हजार रुपैयाँमा सिमित भएको छ।

कम्पनीको विद्युत बिक्री आम्दानी घटेसँगै खुद नाफामा भारी गिरावट देखिएको छ। गत वर्ष कम्पनीको बिद्युत बिक्रीबाट हुने आम्दानी ५७.२७ प्रतिशत घटेर ११ करोड २२ लाख ७३ हजार रुपैयाँ कायम भएको छ । अघिल्लो आवमा भने कम्पनीले २० करोड ६८ लाख बढीको बिजुली बेचेको थियो ।

कुल खर्च ३.७२ प्रतिशत घटाएको कम्पनीले अन्य आम्दानी भने ६४.८९ प्रतिशत बढाएको छ । गत वर्ष कम्पनीको कुल खर्च २६ करोड ५६ लाख रुपैयाँ कायम भएको छ। यता, अन्य शीर्षकको आम्दानी भने १५ करोड ५५ लाखबाट बढेर २५ करोड ६४ लाख रुपैयाँ पुगेको छ।

कम्पनीको प्रतिसेयर आम्दानी पनि २ रुपैयाँ ५६ पैसा घटेको छ । हाल कम्पनीको यस्तो आम्दानी १६ पैसा मात्रै कायम भएको छ। यता, प्रतिसेयर नेटवर्थ भने १०३ रुपैयाँ ४९ पैसा छ।

हाल कम्पनीको चुक्ता पुँजी ३७ करोड ५९ लाख रुपैयाँ कायम भएको छ ।