काठमाडौं । पूर्वाधार विकास मन्त्रालयका सचिव गोपाल प्रसाद सिग्देलले नागढुंगा–सिस्नेखोला सुरुङमार्गको उद्घाटन समारोहमा बोल्दै उक्त सुरुङ नेपालका लागि ऐतिहासिक उपलब्धि भएको बताएका छन् ।
उनले नागढुंगा–सिस्नेखोला सुरुङमार्ग नेपालकै पहिलो सुरुङमार्ग भएकाले यसले देशको पूर्वाधार विकासमा नयाँ युगको सुरुवात गरेको उल्लेख गरे ।
विगतदेखि नै काठमाडौं उपत्यकाको पश्चिमी प्रवेशद्वारका रूपमा रहेको नागढुंगा सडकखण्ड अत्यधिक सवारी चाप र जोखिमयुक्त मार्गका रूपमा परिचित रहेको स्मरण गर्दै उनले अब त्यस अवस्थाको अन्त्य भएको बताए ।
सचिव सिग्देलले सुरुङमार्गले केवल पहाड छिचोलेर बाटो बनाएको मात्र नभई यात्राको समयलाई केही मिनेटमा सीमित गर्दै घुमाउरा सडक र पहिरोको जोखिमबाट यात्रुलाई मुक्ति दिलाउने विश्वास व्यक्त गरे ।
उनले यो उपलब्धि नेपाल सरकारको दूरदर्शी योजना र जापान सरकारको निरन्तर सहयोगको परिणाम भएको बताए । जापान अन्तर्राष्ट्रिय सहयोग नियोग (जाइका) को सहुलियतपूर्ण वित्तीय सहयोगबिना यो परियोजना सम्भव नहुने उल्लेख गर्दै नेपाल–जापानबीचको लामो मित्रताको पछिल्लो र महत्वपूर्ण उदाहरणका रूपमा यस सुरुङमार्गलाई व्याख्या गरे ।
सिग्देलले समारोहमा उपस्थित जाइकाका अध्यक्ष तथा नेपालका लागि जापानका राजदूतप्रति आभार व्यक्त गर्दै नेपालको विकासमा जापानले पुर्याउँदै आएको निरन्तर सहयोगको प्रशंसा गरे ।
उनले नेपाली र जापानी प्राविधिक तथा इन्जिनियरहरूले भौगोलिक जटिलता, विश्वव्यापी कोभिड–१९ महामारी र हिमाली भू–बनोटका चुनौतीका बीच पनि संयुक्त रूपमा काम गरी परियोजना सफलतापूर्वक सम्पन्न गरेको बताए ।
त्यस्तै, निर्माण कार्यमा संलग्न निर्माण कम्पनी, परामर्शदाता तथा विशेषगरी नेपाली र जापानी श्रमिकहरूको योगदानको उच्च मूल्यांकन गर्दै सचिव सिग्देलले उनीहरूको मेहनत, धैर्यता र सीपकै कारण सुरुङमार्ग निर्माण सम्भव भएको उल्लेख गरे ।
उनले यस परियोजनामार्फत नेपाली प्राविधिक तथा कामदारहरूले पहाडी सुरुङ निर्माणसम्बन्धी महत्वपूर्ण अनुभव हासिल गरेको बताउँदै भविष्यमा यस्ता पूर्वाधार आयोजना निर्माणमा उक्त अनुभव उपयोगी हुने विश्वास व्यक्त गरे ।
