काठमाडौं । सरकारले नेपाल आयल निगमको रिक्त रहेको कार्यकारी निर्देशक पदमा नागेन्द्र साहलाई नियुक्त गरेको छ। बुधबार बसेको मन्त्रिपरिषद्को बैठकले पूर्वनायब कार्यकारी निर्देशक तथा पूर्वनिमित्त कार्यकारी निर्देशकको जिम्मेवारी सम्हालिसकेका साहलाई निगमको प्रमुख कार्यकारीको जिम्मेवारी सुम्पिने निर्णय गरेको हो।

विगत लामो समयदेखि निगमको आन्तरिक व्यवस्थापन, इन्धन आपूर्ति प्रणाली र रणनीतिक योजनाहरूमा सक्रिय रहँदै आएका साहलाई निगमको नेतृत्व सुम्पिएसँगै संस्थाले एक अनुभवी प्रशासनिक अधिकारी पाएको छ। तत्कालीन कार्यकारी निर्देशक डा. चण्डिकाप्रसाद भट्टले गत वैशाख ३० गते आफ्नो पदबाट राजीनामा दिएपछि निगमको शीर्ष नेतृत्व पद रिक्त रहँदै आएको थियो।

रिक्त पदपूर्तिका लागि उद्योग, वाणिज्य तथा आपूर्ति मन्त्रालयद्वारा गठित सिफारिस समितिले असार १ गतेको निर्णयानुसार असार २ गते खुला प्रतिस्पर्धात्मक आवेदनका लागि औपचारिक सूचना प्रकाशन गरेको थियो। समितिले परेका आवेदनहरू मध्येबाट योग्यता, अनुभव र व्यावसायिक कार्ययोजनाको मूल्याङ्कन गरी अन्तिम ६ जनाको सङ्क्षिप्त सूची (सर्टलिस्ट) सार्वजनिक गरेको थियो, जसमा नागेन्द्र साह पनि समावेश थिए। अन्तिम प्रतिस्पर्धामा रहेका उम्मेदवारहरू मध्येबाट मन्त्रिपरिषद्ले साहको कार्यअनुभव र निगमप्रतिको पकडलाई प्राथमिकता दिँदै उनलाई चार वर्षका लागि कार्यकारी निर्देशक बनाउने निर्णय गरेको हो।

नवनियुक्त कार्यकारी निर्देशक साहका सामु पेट्रोलियम पदार्थको सहज आपूर्ति, भण्डारण क्षमता अभिवृद्धि, स्वचालित मूल्य प्रणालीको पारदर्शी कार्यान्वयन तथा संस्थागत सुधारका विभिन्न चुनौतीहरू रहेका छन्। निगमभित्रै लामो प्रशासनिक अनुभव हासिल गरिसकेका कारण साहको नेतृत्वमा संस्थाले आपूर्ति व्यवस्थापनलाई थप सुदृढ र प्रविधिमैत्री बनाउने अपेक्षा गरिएको छ।