काठमाडौँ। हिमालयन बैंक लिमिटेडको सहायक कम्पनी हिमालयन लघुवित्त वित्तीय संस्था लिमिटेड (HLBSL) ले आर्थिक वर्ष २०८२/८३ को चौथो त्रैमासको अपरिष्कृत वित्तीय विवरण सार्वजनिक गरेको छ। विवरण अनुसार समीक्षा अवधिमा संस्थाको खुद नाफा, आम्दानी, लाभांश क्षमता तथा प्रतिशेयर आम्दानी (EPS) मा आकर्षक सुधार देखिएको छ।

हिमालयन बैंकको बलियो अभिभावकत्व रहेको यस लघुवित्तले गत आर्थिक वर्षको अन्त्यसम्म १० करोड ६६ लाख रुपैयाँ खुद नाफा आर्जन गरेको छ। यो नाफा अघिल्लो आर्थिक वर्षको (७ करोड १४ लाख रुपैयाँ) तुलनामा ४९.१८ प्रतिशत ले बढी हो।

वित्तीय सूचकका मुख्य आकर्षणहरू

• नाफा र आम्दानी: लघुवित्तको खुद ब्याज आम्दानी अघिल्लो वर्षको ३७ करोड ८ लाख रुपैयाँबाट बढेर ४४ करोड २१ लाख रुपैयाँ पुगेको छ। त्यस्तै, सञ्चालन नाफा १० करोड ५४ लाख रुपैयाँबाट बढेर १५ करोड २१ लाख रुपैयाँ पुगेको छ।

• आकर्षक लाभांश क्षमता: नियमनकारी समायोजन तथा अघिल्लो वर्षको सञ्चित नाफा समायोजनपछि गत असार मसान्तसम्म लघुवित्तको वितरणयोग्य नाफा ९ करोड २५ लाख २१ हजार रुपैयाँ पुगेको छ। यस आधारमा संस्थाको प्रतिशेयर वितरणयोग्य नाफा २७ रुपैयाँ १३ पैसा कायम भएको छ, जसले शेयरधनीहरूका लागि आकर्षक लाभांशको बलियो सम्भावना देखाउँछ।

• प्रतिशेयर आम्दानी: संस्थाको प्रतिशेयर आम्दानी (EPS) ३१ रुपैयाँ २६ पैसा पुगेको छ।

व्यावसायिक विस्तार र कोषको स्थिति

लघुवित्तको चुक्ता पूँजी ३४ करोड १० लाख ८६ हजार रुपैयाँ रहेको छ भने सञ्चित नाफा र जगेडा कोष गरी कुल कोष २९ करोड १७ लाख २३ हजार रुपैयाँ पुगेको छ।

व्यापार र नाफा दुवैमा राम्रो फड्को मारेको यस संस्थाको निष्कृय कर्जा (खराब कर्जा) भने ९.०४ प्रतिशत पुगेको छ। लघुवित्तले यस खराब कर्जालाई प्रभावकारी रूपमा असुली गर्न सकेको खण्डमा २७ रुपैयाँ १३ पैसाको प्रतिशेयर लाभांश क्षमताले लगानीकर्ताहरूलाई उत्कृष्ट प्रतिफल दिने देखिन्छ।