भोलीदेखि बिमाका सम्पूर्ण शाखा बन्द
वि.सं.२०७८ वैशाख २९ बुधवार
काठमाडौँ । काठमाडौँ उपत्यकामा बीमा कम्पनीका सबै शाखाहरु भोलि (वैशाख ३० गते, बिहीबार) देखि बन्द हुने भएका छन् । कोरोना संक्रमणको जोखिम बढ्दै गएपछि जिल्ला प्रशासन कार्यालय र बीमा समितिले दिएको निर्देशन अनुसार बीमा कम्पनीहरुका कर्पोरेट कार्यालयबाहेक सम्पूर्ण शाखाहरू जेठ १३ गतेसम्म बन्द हुने भएका हुन् ।
यसैगरी, केन्द्रिय कार्यालय पनि १० जनाले मात्रै सञ्चालन गरिने भएको हो । बीमा कम्पनीहरुले आफ्नो केन्द्रिय कार्यालय सञ्चालन गर्न र बीमा सेवा निर्वाध रुपले प्रवाह गर्न जनस्वास्थ्य र सुरक्षाका सम्पूर्ण मापदण्ड अबलम्बन गरी बढीमा दश जनासम्म कर्मचारी उपस्थित गराई सुरक्षित रुपले सेवा प्रवाहको व्यवस्था सुनिश्चित गर्न बीमा समितिले निर्देशन दिएको छ ।
त्यस्तै, काठमाडौं उपत्यका बाहिरका प्रादेशिक तथा शाखा कार्यालयहरु सञ्चालनको हकमा सम्बन्धित जिल्ला प्रशासन कार्यालयसँग समन्वय गरी सेवा प्रवाह गर्नुपर्ने छ ।
२०७८ वैशाख २९ गते प्रकाशित ।
प्रकाशित समय : १०:३३ बजे
