काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले सरकारले गरेको असंवैधानिक कदमलाई अदालतले फेरि बदर गरिदिने दाबी गरेका छन् ।

गठबन्धनका दलहरुको बैठकपछि पत्रकारहरुसँग अध्यक्ष दाहालले सरकारको कदमविरुद्ध राजनीतिक र कानूनी प्रतिवाद गर्ने निर्णय भएको बताए । आफूहरु संसद विघटनविरुद्ध अदालत जाने र अदालतले पहिलेजस्तै संसद पुनःस्थापनाको फैसला गर्ने उनको दाबी थियो ।

उनले सरकारको पछिल्लो कदम असंवैधानिक, निरंकुश, स्वैच्छाचारी र प्रतिगमनकारी रहेको बताए । यो प्रतिगमनकारी कदमका विरुद्ध १४९ जना सांसदको हस्ताक्षरसहित सर्वोच्च अदालत जाने जानकारी दिए।

अध्यक्ष दाहालले यसपटक पनि संसद विघटनविरुद्ध अदालत र सडकबाट प्रतिवाद गरिने बताए ।

२०७८ जेठ ८ गते प्रकाशित