काठमाडौँ । नेपालमा इसेवा डिजिटल वालेटको झन्डै ५० लाख प्रयोगकर्ता छन्। विगतका दिनमा इसेवाका ग्राहकले पानी–बिजुलीको बिल, स्कुल–कलेजको फी, हवाई टिकट, मोबाइलमा टपअपलगायत अन्य सेवाका लागि प्रयोग गर्दै आएका थिए। आफ्ना ग्राहकलाई थप सेवा प्रदान गर्नुका साथै नेपालमा डिजिटल रेमिट्यान्समा रुपान्तरण गर्ने हेतुका साथ इसेवाले ‘इसेवा मनी ट्रान्सफर’ सञ्चालन गरेको झन्डै दुई वर्ष भयो।

सन् २०१९ सेप्टेम्बरबाट नेपाल राष्ट्र बैंकबाट लाइसेन्स प्राप्त गरी इसेवा मनी ट्रान्सफरले रेमिट्यान्स सुविधा दिँदै आएको छ। नेपालमा अहिले ५२ वटा रेमिट्यान्स कम्पनीहरु सञ्चालनमा छन्।

नेपालको सबैभन्दा कान्छो रेमिट्यान्स कम्पनी इसेवा मनी ट्रान्सफर छोटो समयमै ठूलो संख्यामा ग्राहक समेट्न सफल भएको छ। विदेशबाट रेमिटेन्स डिजिटली पठाउन सहजीकरण गर्दै रेमिट्यान्स व्यवसायमा ठूलो फड्को मारेको इसेवा मनी ट्रान्सफर नेपालको टप ७ रेमिट्यान्स कम्पनीमा पर्न सफल भएको छ।

मनीग्राम, वर्ल्ड रेमिट, रेमिटली, स्मल वर्ल्ड, लिगल रेमिटलगायत अन्य २३ वटा अन्तर्राष्ट्रिय रेमिट्यान्स कम्पनीसँग सहकार्य गरेको इसेवा मनी ट्रान्सफरको सुविधा झन्डै २०० देशमा उपलब्ध छ। इसेवा मनी ट्रान्सफरबाट प्रयोगकर्ताले अहिले जापान, कोरिया, बेलायत, अमेरिका, अस्ट्रेलियालगायत अन्य देशबाट रेमिट्यान्स पठाउने गरेका छन्। उक्त रेमिट्यान्सको ८० प्रतिशत हिस्सा बैंकमा, १५ प्रतिशत वालेटमा र बाँकी ५ प्रतिशत क्यासमा भुक्तानी हुने गरेको छ।

नेपालजस्तो मुलुकमा अधिकांश घरको कम्तीमा एक सदस्य रोजगारी, शिक्षालगायत विभिन्न सिलसिलामा विदेशमा रहेका छन्। विदेशमा रहेका नागरिकलाई इसेवा मनी ट्रान्सफरले सञ्चालन भएको कम समयमा नै अन्य रेमिट्यान्स कम्पनीको तुलनामा छिटो, सुरक्षित साथै कम दरमा डिजिटल रेमिट्यान्सको सुविधा दिन सफल भएको छ।

ग्राहकले क्यासमा मात्र नभई वालेट साथै बैंक खातामा सजिलै पैसा पठाउन सक्ने भएकाले गर्दा पनि इसेवा मनी ट्रान्सफरको प्रयोगकर्ताको संख्या दैनिक रुपमा बढ्दो क्रममा छ।

अहिले नेपालमा इसेवाका झन्डै १ लाख सञ्जाल छन्। यसका साथै ८ हजारभन्दा बढी बैंक, वाणिज्य बैंक, विकास बैंक, सहकारीलगायत अन्य विभिन्न फाइनान्स कम्पनीसँग सहकार्य गरी इसेवाले विभिन्न किसिमका सेवा दिन सफल भएको छ। इसेवा मनी ट्रान्सफरको आउने दिनमा यी काउन्टरबाट आफ्ना ग्राहकलाई रेमिट्यान्सको सुविधा प्रदान गरी रेमिट्यान्स बिजनेसमा ठूलो फड्को मार्ने योजना रहेको छ।

२०७८ भदौ ३० गते प्रकाशित