काठमाडौँ – नेपाली शेयर बजारले केही समय देखी नयाँ रेकर्ड कायम गरेको छ भने नेप्सेले एक वर्षमा दुई गुणा भन्दा बढी अंकले छलाङ मारेको हो ।

वर्षको अन्तिम दिन चैत ३१ गते मंगलबार नेप्से दुई हजार सात सय ८ विन्दुमा पुग्यो । यो हालसम्मकै उच्च विन्दु हो । त्यसरीनै , यस वर्ष शेयर बजारमा हालसम्मकै उच्च कारोबार रकमसहित अर्को नयाँ रेकर्ड कायम भएको छ । २०७७ साल माघ २६ गते सोमबारका दिन नेप्सेमा १० अर्ब ६१ करोड ९१ लाख बराबरको कारोबार भएको थियो ।

यस वर्ष शेयर बजार र सार्वजनिक शेयर निष्कासनमा सर्वसाधारणको आकर्षण निकै बढेको छ । यससँगै डिम्याट खाता खोल्नेको सङ्ख्या पनि बढ्यो । यो वर्षको ८ महिनामै करिब १६ लाख बढीले डिम्याट खाता खोलेका छन् । सिडिएस एण्ड क्लियरिङ लिमिटेडले दिएको जानकारी अनुसार गत साउन मसान्तसम्म डिम्याट खाताको सङ्ख्या १८ लाख ५ हजार ६०७ मात्रै रहेकोमा हाल डिम्याट खाताको सङ्ख्या ३४ लाख २ हजार २०३ पुगेको छ । नेप्से नयाँ उचाइमा पुग्दा त्यसको सकारात्मक प्रभाव बजार पुँजीकरणमा समेत परेको छ । यो वर्षको अन्तिमसम्म आइपुग्दा बजार पुँजीकरणमा समेत उल्लेखनीय वृद्धि भएको देखिन्छ । बजार पुँजीकरणमा समेत नेप्से परिसूचकमा जस्तै दुई गुणा भन्दा बढीले वृद्धि भएको छ ।

नेपाल स्टक एक्सचेन्जका अनुसार यो वर्षको अन्तिम दिन चैत्र ३१ गते मंगलबारको कारोबार पछि बजार पुँजीकरण ३७ खर्ब ५८ अर्ब ९ करोड ७५ लाख ७१ हजार पुगेको छ । यो नेपालको कूल गार्हस्थ्य उत्पादनको हाराहारी हो ।

यस वर्षको पहिलो कारोबार वैशाख ३० गते मंगलबार नेपालको बजार पुँजीकरण १५ खर्ब ६७ अर्ब ८५ करोड ५३ लाख २४ हजार रहेको थियो ।