काठमाडौं । पोखरा महानगरपालिकाले आगामी आर्थिक वर्षको बजेट विनियोजन गरेको छ । महानगरपालिकाले सडक सरसफाई विशेष प्राथमिकता दिएको छ । सोही अनुसार पिच सडक पखाल्नको लागि एक थान ब्रुमर खरिद महानगरले जनाएको छ ।

महानगरले अस्फाल्ट प्रविधिबाट गरिएको पिच सडक आवश्यकता अनुसार पखाल्न मिल्ने गरी कष्टमाइज गरिएको एक थान सवारी साधन र सोही सडक सफा गर्न १ थान ब्रुमर खरिद गर्ने जनाएको हो । यसका लागि महानगरले २ करोड ५० लाख रुपैयाँ बजेट विनियोजन गरेको छ ।

बजेट प्रस्तुत गर्दै महानगरले जलकुम्भी हटाउन खरिद गरिएको साधनको आवधिक मर्मत संभार गरिने समेत जनाएको छ । त्यस्तै पूर्वाधार निर्माणको गुणस्तर परीक्षणको लागि स्थापना गरिएको प्रयोगशालाको स्तरोन्नति, प्रयोगशालामा यन्त्र तथा उपकरणहरु थप गरिने र यसलाई महानगरपालिकाको एउटा आम्दानी गर्ने एकाइको रुपमा विकास समेत गरिने बजेटमा उल्लेख छ । प्रयोगशालाको क्षमता विस्तामा १ करोड बजेट विनियोजन गरिएको छ ।

साथै बेगनासताललाई पृथ्वी राजमार्गसँग जोड्ने तालचोक बेगनास सडक नेपालकै नमूना सडकको रुपमा निर्माण गर्ने महानगरको योजना रहेको छ । उक्त विश्व बैंकको आर्थिक सहयोगमा निर्माणाधिन रहेको छ । यसको लािग १ अर्ब ५३ करोड रुपैयाँको बहुवर्षीय बोलपत्र प्रकाशित भइसकेको छ । केन्द्रको सर्शत अनुदानबाट संचालन गरिने उक्त सडक आयोजनाको लागि आगामी आर्थिक वर्षमा २४ करोड २५ लाख बजेट महानगरले विनियोजन गरिएको छ ।

त्यस्तै, चालु आर्थिक वर्षमा नै ठेक्का सम्झौता भइसकेका र आगामी आर्थिक वर्षको लागि प्रस्तावित कनेक्टिब सडकतर्फ गरी कुल १ अर्ब २० करोड रुपैयाँ बजेट प्रस्ताव गरिएको छ ।

२०७८ असार १० गते प्रकाशित