काठमाडौं । स्थापनाको ३६ वर्षपछि नविल बैंकले पहिलोपटक एउटा फाइनान्स कम्पनी अक्वायर गर्ने भएको छ । नविल बैंकमा चौधरी ग्रुपको ठुलो हिस्सा लगानी छ । युनाइटेड फाइनान्स पनि चौधरी ग्रुपकै लगानीमा खुलेको वित्त कम्पनी हो ।

नबिल बैंकले युनाइटेड फाइनान्सलाई ३५ रुपैयाँमा किन्ने भएको छ । आगामी असारभित्रै एउटै व्यालेन्ससिट निकाल्नेगरी मर्जरको एमओयू भएको नबिल बैंकका डिजिएम मनोज ज्ञवालीले बताए ।

शुक्रबार मर्जरसंबन्धी सम्झौता पत्रमा हस्ताक्षर भएको छ । युनाइटेड फाइनान्समा विनोद चौधरीका भाइ बसन्त चौधरी र मोरङ अटोका मालीक विष्णुकुमार अग्रवालको लगानी रहेको छ ।

नबिल बैंकको चुक्ता पुँजी १३ अर्व ४८ करोड रहेको छ । युनाइटेड फाइनान्सको हाल १ अर्व पुँजी रहेको छ । मर्जरपछि नविल बैंकलाई करिव ३३ करोड पुँजी थपिनेछ । नबिल बैंकको ११९ शाखा रहेको छ भने युनाइटेडको २८ शाखा रहेको छ । नबिलमा ११ सय कर्मचारी रहेका छन भने युनाइटेडमा २ सय २५ जना कर्मचारी रहेका छन ।

नबिल बैंकको मर्जर कमिटि संयोजक उदयकृष्ण उपाध्याय र युनाइटेड फाइनान्सको तर्फबाट मर्जर कमिटीका सदस्य मनिष खेम्काले सहमतिपत्रमा हस्ताक्षर गरे । २ वर्ष अघि जनता बैंकको डेपुटी सीईओको जागिर छाडेर युनाइटेड फाइनान्सको सीईओ बनेका अजय मिस्त्र विदा हुने भएका छन । मर्जरपछि सीईओ मिस्त्र हट्ने पक्कापक्की भएको बताइएको छ । युनाइटेड फाइनान्समा भारतको सुन कर्जामा प्रख्यात पाएको मुटुथ फाइनान्सको २० प्रतिसत लगानी रहेको छ ।