काठमाडौं । नेपाल मोबाइल व्यवसायी महासंघको तेस्रो केन्द्रीय महाधिवेशन तथा पाँचौं साधारणसभा यही जेठ १ र २ गते काठमाडौंमा हुने भएको छ । महासंघले बिहीबार पत्रकार सम्मेलन गर्दै देशभरका मोबाइल व्यवसायीको सहभागितामा यही जेठ १ र २ गते महाधिवेशन आयोजना गर्न लागिएको जनाएको हो ।
महासंघका अनुसार हाल देशका सातै प्रदेश र ७० जिल्लामा शाखा विस्तार भइसकेको छ भने २७ हजार ४०० साधारण सदस्य आबद्ध रहेका छन् । महाधिवेशनका लागि देशभरबाट करिब १५ सय प्रतिनिधि काठमाडौं आउने क्रममा रहेको महासंघले जनाएको छ ।
सुदूरपश्चिम, कर्णालीदेखि पूर्वी क्षेत्रसम्मका प्रतिनिधिहरू काठमाडौं आउने क्रम जारी रहेको बताइएको छ । महाधिवेशनबाट ५५ सदस्यीय नयाँ केन्द्रीय कार्यसमिति चयन गरिनेछ । विधानअनुसार अध्यक्ष, निवर्तमान अध्यक्ष, वरिष्ठ उपाध्यक्ष, सात उपाध्यक्ष, महासचिव, कोषाध्यक्ष, चार सचिवमध्ये एक महिला सहित तथा सहकोषाध्यक्ष पदमा निर्वाचन हुनेछ ।
यस्तै, प्रत्येक प्रदेशबाट दुई जनाका दरले १४ केन्द्रीय सदस्य, १४ संस्थापक संस्थाबाट एक/एक जना प्रतिनिधि, बागमती प्रदेशबाट थप पाँच जना तथा अध्यक्षबाट समावेशिताका आधारमा पाँच जना मनोनीत गर्ने व्यवस्था रहेको महासंघले जनाएको छ ।
महाधिवेशनको उद्घाटन कार्यक्रम जेठ २ गते बिहान ९ बजे काठमाडौंस्थित राष्ट्रिय सभागृह मा हुनेछ । त्यसअघि जेठ १ गते कौशलटारस्थित ह्वाइट पार्टी प्यालेसमा बन्दसत्र सुरु हुने कार्यक्रम तय गरिएको छ ।
महासंघले मोबाइल व्यवसायीका समस्या राज्यसमक्ष पु¥याउँदै देशको अर्थतन्त्र उकास्न सञ्चारमाध्यमको महत्वपूर्ण भूमिका रहने विश्वास व्यक्त गरेको छ ।
