काठमाडौं । चीनको अग्रणी अटोमोबाइल निर्माता चांगानको बहुप्रतीक्षित मोडल ‘दिपल निभो क्यू०५’ (Deepal Nevo Q05) एउटा अभूतपूर्व विश्वव्यापी डिजाइन कथा बोकेर नेपाली बजारमा भित्रिने अन्तिम तयारीमा छ।

३१ वटा देश तथा क्षेत्रका ९१५ जना विशेषज्ञ सम्मिलित अन्तर्राष्ट्रिय डिजाइन टोलीले तयार पारेको यो एसयूभीको नेपाल आगमनलाई अटो क्षेत्रमा निकै चासोका साथ हेरिएको छ। फक्सवागन ग्रुपका पूर्व डिजाइन प्रमुख एवं चांगानका ग्लोबल डिजाइन उपाध्यक्ष क्लाउस जेसियोराको नेतृत्वमा विकसित यस गाडीमा विश्वव्यापी बजार, विविध संस्कृति र बहुआयामिक दृष्टिकोणलाई एउटै उत्कृष्ट डिजाइन पद्दतिमा ढालिएको छ। चीन र थाइल्यान्ड जस्ता अन्तर्राष्ट्रिय बजारमा आफ्नो पकड जमाइसकेपछि नेपाल भित्रिन लागेको यो गाडीको मूल विशेषता नै यसको विश्वस्तरीय डिजाइन संरचना हो।

‘इन्स्पायर्ड बाइ लाइट’ (प्रकाशबाट प्रेरित) अवधारणामा आधारित दिपल निभो क्यू०५ को डिजाइनले भित्री क्याबिनको ठाउँलाई अलिकति पनि नघटाई गाडीलाई सडकमा चौडा, सन्तुलित र मजबुत देखाउँछ। ४,४३५ एमएम लम्बाइ, १,८५५ एमएम चौडाइ र २,७३५ एमएम ह्विलबेस रहेको यस मोडलमा ०.८६ को चौडाइ-उचाइ अनुपात र ०.६२ को एक्सल-लम्बाइ अनुपात कायम गरिएको छ, जसले यसलाई प्रिमियम सिलुएट र एयरोडायनामिक रूप प्रदान गर्छ। यसका साथै अँध्यारोमा पनि सहजै चिन्न सकिने अगाडिको निरन्तर लाइट सिग्नेचर र पछाडिको स्टार-रिङ शैलीले गाडीलाई आधुनिक पहिचान दिएका छन्।

हावाको बहावलाई सहज बनाउन ०.२६५ सीडी (Drag Coefficient) ड्र्याग कोएफिसियन्ट कायम गरिएकाले यसको बाहिरी सरलता र चिल्लो सतह केवल सजावट मात्र नभई उत्कृष्ट प्रदर्शनका लागि वैज्ञानिक रूपमा तयार पारिएको स्पष्ट हुन्छ।

नेपालमा औपचारिक सार्वजनिक हुनुअघि नै यस एसयूभीले ‘गोल्डेन ए’ डिजाइन अवार्ड’ जितेर अन्तर्राष्ट्रिय मञ्चमा आफ्नो प्राविधिक र रचनात्मक उत्कृष्टता सिद्ध गरिसकेको छ। होचो देखिने आकर्षक सिलुएट, स्पष्ट सोल्डर लाइन र फराकिलो रियर ग्राफिकले यसलाई सामान्य शहरी इभीभन्दा बढी भरिलो र भव्य उपस्थिति प्रदान गर्छ।

नेपाली अटोप्रेमीहरूका लागि अहिलेसम्म तस्बिर र टिजरहरूमा मात्र सीमित रहेको यो गाडी आगामी नाडा अटो शोमा प्रत्यक्ष प्रदर्शन गरिनेछ, जहाँ शोको तीव्र प्रकाशमा यसका प्यानल संक्रमण, बडी र पाङ्ग्राको सन्तुलन तथा यसले दाबी गरेको क्याबिन स्पेसको वास्तविक परीक्षा हुनेछ। ३१ देशका ९१५ डिजाइनरको अथक मिहिनेतबाट जन्मिएको दिपल निभो क्यू०५ को वास्तविक सफलता र लोकप्रियताको अन्तिम फैसला भने नेपाली सडकमा गाडीको कभर हटेपछि प्रत्यक्ष अवलोकन गर्ने ग्राहकहरूको प्रतिक्रियामै निर्भर रहनेछ।