काठमाडौं । काठमाडौंको भृकुटीमण्डपमा जारी नाइमा मोबिलिटी एक्स्पो २०२६ मा १ हजार २०० युनिट बढी दुईपाँग्रे सवारी साधन बुकिङ भएका छन् ।

बिक्रेताहरूले उपलब्ध गराएको तथ्यांक अनुसार आइतबार दिउँसो ३ बजेसम्म विभिन्न ब्राण्डका १२३३ युनिट स्कुटर र मोटरसाइकल बुकिङ भएका हुन् ।

नाइमामा डेढ दर्जन दुईपाँग्रे सवारी ब्राण्डले सहभागिता जनाएका छन् । ती ब्राण्डले १ दर्जन नयाँ मोडल लन्च गरेका छन् । नाइमामा मुख्यगरी इलेक्ट्रीक स्कुटर र नयाँ एडभ्न्चर मोटरसाइकलमा अवलोकनकर्ताको आकर्षण देखिएको छ ।

नाइमामा सबैभन्दा धेरै ४०० युनिट बढी एथरका इलेक्ट्रीक स्कुटर बुकिङ भएका छन् । वैद्य इनर्जीले नाइमामा एथर रिज्टाको नयाँ भेरियन्ट लन्च गरेको थियो । ग्राहकले नयाँ रिज्टासँगै अन्य मोडल पनि बुकिङ गरेको कम्पनीले जनाएको छ ।

सीएक्स मोटोका २०० युनिट बढी मोटरसाइकल बुकिङ भएका छन् । नेपालमा लागि सीएफमोटोको आधिकारिक बिक्रेता बाइकर्स नेपालले नाइमामा २०२६ को वल्र्ड सुपर बाइक रेसिङ च्याम्पियनसिप जित्ने पहिलो चिनियाँ मोटरसाइकल जेडएक्स मोटो ८०० आरआर लन्च गरेको थियो ।

याडिका १४५ युनिट बुकिङ भएको छ । बुकिङ भएकामध्ये ४५ युनिट डेलिभरी समेत गरिसकिएको नेपालका लागि याडियाको आधिकारिक वितरक कुजु नेपालले जनाएको छ । कम्पनीले नाइमा एक्स्पो सुरु हुनु केही दिन अघि मात्रै जीटी ७०, जीटी ८० र जीएस ७० गरी तीन नयाँ मोडल सार्वजनिक गरेको थियो ।

ट्रायम्फका मोटरसाइकल पनि १०० युनिट बढी बुकिङ भएका छन् । हंसराज हुलासचन्द एण्ड कम्पनीले नाइमा एक्स्पोमा ट्रायम्फको सबैभन्दा सस्तो नयाँ मोटरसाइकल ‘ट्रायम्फ स्पीड टी ४’ लन्च गरेको थियो । कम्पनीले उक्त मोटरसाइकलको मूल्य ६ लाख ५० हजार रुपैयाँ तोकेको छ ।

त्यस्तै, सीएफमाेटाे १०८, सुजुकीको ५०, भोल्टसको २५, मोर्बिडेली ४५, रोयल इनफिल्ड १००, केटीएमको ६० युनिट मोटरसाइकल बुकिङ भएको बिक्रेता कम्पनीहरले जनाएका छन् । यी बाहेक अन्य ब्राण्डको तथ्यांक बाहिरिएको छैन ।

कर्पाेरेट बजार

प्रकाशित समय : २२:२९ बजे