काठमाडौँ । नेपाल उद्योग वाणिज्य महासङ्घ (एफएनसीसीआई) को आगामी जेठ ८ गते हुने कोषाध्यक्ष पदको निर्वाचनका लागि वर्तमान कार्यकारी सदस्य अम्बिका पौडेलले आफ्नो उम्मेदवारी घोषणा गरेका छन् । महासङ्घमा लगातार तेस्रो कार्यकाल कार्यसमिति सदस्यका रूपमा निर्वाचित भई काम गरिसकेका पौडेलले संस्थागत सुशासन, पारदर्शिता र सम्पूर्ण व्यवसायीहरूको अपनत्व महसुस गराउन आफ्नो उम्मेदवारी रहेको प्रस्ट पारेका हुन् ।

विगतमा महासङ्घको पूँजी बजार फोरम तथा कर तथा राजस्व समितिको सभापति जस्तो जिम्मेवारी निर्वाह गरिसकेका उनले निजी क्षेत्रको मुद्दामा निरन्तर वकालत गर्दै आएका छन् । उम्मेदवारी घोषणाका क्रममा पौडेलले कर, भन्सार, अन्तःशुल्क लगायतका नीतिगत तथा व्यवहारिक समस्या समाधानका लागि सरकारसँग निरन्तर संवाद र सहकार्य गर्ने आफ्नो अनुभव नै मुख्य जितको आधार भएको उल्लेख गरे ।

“बलियो अर्थतन्त्रका लागि बलियो निजी क्षेत्र आवश्यक हुन्छ र बलियो निजी क्षेत्रका लागि सक्षम, पारदर्शी तथा उत्तरदायी महासङ्घ उत्तिकै अपरिहार्य हुन्छ,” उम्मेदवारी सार्वजनिक गर्दै उनले भने, “मेरो उम्मेदवारी केवल पद प्राप्तिका लागि होइन, महासङ्घलाई अझ गतिशील, प्रभावकारी र सम्पूर्ण व्यवसायीहरूको साझा घर बनाउनका लागि हो ।”

विगतका निर्वाचनहरूमा व्यवसायीहरूबाट उत्कृष्ट मतसहित निर्वाचित हुँदै आएका उनले साना, मझौला र ठूला सबै प्रकृतिका व्यवसायीका आवाजलाई महासङ्घको नेतृत्व तहमा समान रूपमा उठाउने प्रतिबद्धता समेत व्यक्त गरेका छन् । महासङ्घलाई केही व्यक्तिको मात्र नभई समग्र देशका उद्योगी–व्यवसायीहरूको साझा थलोका रूपमा विकास गर्ने आफ्नो मुख्य संकल्प रहेको उनको भनाइ छ ।

महासङ्घभित्र व्यावसायिक छविका रूपमा चिनिएका उनले सम्पूर्ण व्यवसायी साथीहरूलाई आफ्नो संस्थागत विकासको यस अभियानमा साथ, सुझाव र अमूल्य समर्थन दिन अपिल गरेका छन् । जेठ ८ गते हुने कोषाध्यक्षको निर्वाचनलाई महासङ्घको भावी आर्थिक नीति र सुशासनको दिशा तय गर्ने महत्त्वपूर्ण कडीका रूपमा हेरिएको छ ।