काठमाडौं । महालक्ष्मी विकास बैंकले ‘ग्लोबल मनी विक २०२६’ को अवसरमा देशव्यापी रूपमा वित्तीय साक्षरता तथा सचेतना कार्यक्रम सञ्चालन गर्दै हजारौँलाई वित्तीय शिक्षामा जोड दिएको छ ।

चैत २ देखि ८ गतेसम्म साताव्यापी रूपमा सञ्चालन गरिएको अभियानअन्तर्गत बैंकले वित्तीय पहुँचबाट बाहिर रहेका विभिन्न लक्षित समूह पहिचान गरी देशभरका शाखा तथा प्रादेशिक कार्यालयमार्फत कार्यक्रमहरू सम्पन्न गरेको हो ।

दरबारमार्ग, हेटौँडा, इटहरी, भैरहवा, पोखरा (विजयपुर), वीरगञ्ज, धनगढी, सूर्यपुरा, डडेलधुरा, लहान, बिचबजार, मंगलसेन, चिप्लेढुङ्गा लगायतका शाखाहरूले विद्यार्थी तथा युवामाझ वित्तीय ज्ञान, सीप र व्यवहार विकासमा केन्द्रित कार्यक्रम सञ्चालन गरेका थिए । “स्मार्ट मनी टक्स” नारासहित आयोजित कार्यक्रममा एक हजारभन्दा बढीको सहभागिता रहेको बैंकले जनाएको छ ।

कार्यक्रमहरूमा बचत, कर्जा, लगानी, विद्युतीय बैंकिङ सेवा, विप्रेषण, बीमा, धितोपत्र बजार, जोखिम व्यवस्थापन, वित्तीय अनुशासन तथा वित्तीय ठगीबाट बच्ने उपायजस्ता विषयमा जानकारी दिइएको थियो । साथै, नेपाल राष्ट्र बैंकलगायत विभिन्न संस्थाले आयोजना गरेका प्रभातफेरी कार्यक्रममा पनि बैंकले सक्रिय सहभागिता जनाएको थियो ।

यसै अवसरमा नेपालगञ्ज शाखाले बाँकेको श्री युद्ध संस्कृत माध्यमिक विद्यालयका विद्यार्थीहरूलाई शैक्षिक सामग्री वितरण गरेको जनाएको छ । बैंकले आफ्ना आधिकारिक सामाजिक सञ्जालमार्फत समेत सचेतनामूलक सामग्री र भिडियोहरू प्रसारण गरी वित्तीय शिक्षाको महत्वबारे व्यापक सन्देश प्रवाह गरेको छ ।

३१ वर्षदेखि “सबल बैंक, सफल सहकार्य” नारालाई आत्मसाथ गर्दै सेवा दिँदै आएको बैंकका देशभर १०३ शाखा कार्यालय र करिब ८ लाख ५० हजारभन्दा बढी ग्राहक रहेका छन् ।