काठमाडौं। राष्ट्रिय स्वतन्त्र पार्टी (रास्वपा) मकवानपुरका संस्थापक सभापति भरतप्रसाद पराजुली पार्टी परित्याग गरि नेपाली कांग्रेसमा प्रवेश गरेका छन् ।

कांग्रेस सभापति गगनकुमार थापाले पराजुलीलाई आज बिहान सर्लाहीमा आयोजित कार्यक्रममा पार्टीमा स्वागत गरेका हुन्। उनीसंगै रास्वपाका मकवानपुर क्षेत्र नम्बर-२ का चुनावी संयोजक निराजन बर्तौला पनि काङ्ग्रेसमा फर्किएका हुन्।

पराजुली २०७९ को प्रतिनिधि सभा निर्वाचनमा मकवानपुर क्षेत्र नम्बर २ बाट रास्वपाको उम्मेदवार बनेका थिए । उक्त निर्वाचनमा पराजुलीले १२ हजारभन्दा बढी मत प्राप्त गरेका थिए । मकवानपुरको मनहरी गाउँपालिका निवासी पराजुली मकवानपुरको पश्चिम क्षेत्रमा राम्रो पकड भएका नेता मानिन्छन् । यसपटक प्रतिनिधि सभा सदस्य निर्वाचनमा रास्वपाबाट टिकटको प्रमुख दावेदार रहेपनि पछि आएकालाई टिकट दिएपछि पराजुली असन्तुष्ट बनेका थिए ।

मकवानपुरमा पार्टी निर्माणमा योगदान गरेकालाई पाखा लगाएर पछि आएकालाई टिकट दिएको भन्दै रास्वपाका धेरै कार्यकर्ता असन्तुष्ट भएका छन्।

कांग्रेस प्रवेश गरेपछि पराजुलीले रास्वपामा बसेर सच्चा राजनीति गर्न नसकिने देखिएकाले कांग्रेसमा फर्किएको बताए । उनले भने, ‘रास्वपाको संगठन विस्तारमा धेरै दुःख गरेँ, तर त्यो पार्टी दुःख गर्नेका लागि होइन रहेछ, पुँजीवादी सोच भएको पार्टीमा बस्न मन नलागेर कांग्रेसमा फर्किएँ।’ रास्वपा जानुअघि पराजुली कांग्रेसमै थिए ।