काठमाडौं । नेपाल सरकार, राष्ट्रिय व्यावसायिक प्रशिक्षण प्रतिष्ठान र नेपाल हस्तकला महासंघबीच समझदारीपत्रमा हस्ताक्षर भएको छ ।

बुधबार काठमाडौंमा एक कार्यक्रमको आयोजना गर्दै रोजगारउन्मूख सीप विकास तालिम सञ्चालन सम्बन्धी समझदारीपत्रमा हस्ताक्षर भएको हो ।

सोही कार्यक्रममा श्रम, रोजगार तथा सामाजिक सुरक्षा मन्त्री शरत सिंह भण्डारीले सरकारले आगामी १० वर्षलाई आन्तरिक रोजगार प्रवद्र्धन दशकको रुपमा अगाडि बढाउन खोजी रहेको बताएका छन् ।

उनले भने, ‘सरकारले आगामी १० वर्षलाई आन्तरिक रोजगार प्रवद्र्धन दशकको रुपमा अगाडि बढाउन खोजी रहेका छौ । यो शिलशिलामा बजारमा आवश्यक भएको दक्ष जनशक्ति निर्माण गरेर उनीहरुलाई उत्पादनशिल क्षेत्रसँग जोडेर रोजगारका सम्भावनाहरुलाई ल्याउने त्यसले मुलुकको उत्पादन बढाउने र मुलुकलाई समृद्ध बनाउने । यसमा तीनवटा बुँदालाई अगाडि सारेका छौ एकमा सिप, दोस्रो सिप र तेस्रो पनि सिप नै जबसम्म सिपयुक्त जनशक्ति तयार हुन सक्दैँन् तबसम्म हामीले भएका सम्भावना पनि प्रयोग गर्न सक्दैँनौ ।’

यस्तै, वैदेशिक रोजगारको विकल्प आन्तरिक रोजगार नै हो भनेर अगाडि बढेको पनि उनको भनाई छ ।

उनले भने, ‘अहिले मुलुकमा जुन किसिमले रोजगारीको अवसरहरु सिर्जना गर्न हामी लागि परेका छौ र श्रम बजारमा जसरी बेरोजगारको चाप बढि रहेको छ, जसले गर्दा वैदेशिक रोजगारमा जानुपर्ने बाध्यता भईरहेको छ । यसको लागि मुलुकभित्रको उत्पादन र उद्यमशिलतालाई बढाएर कहाँ कस्ता रोजगारहरु छन् कि भन्ने हिसाबले वैदेशिक रोजगारको विकल्पको रुपमा आन्तरिक रोजगार नै हो भनेर अगाडि बढेका छौ ।’

रोजगारमुलक सिप विकास तालिम मार्फत रोजगारदाता संस्थाका लागि दक्ष जनशक्ति उत्पादन गरी बेरोजगारी न्यूनिकरण गराउने उद्देश्यले नेपाल सरकार, श्रम, रोजगार तथा सामाजिक सुरक्षा मन्त्रालय, राष्ट्रिय व्यावसायिक प्रशिक्षण प्रतिष्ठान र नेपाल हस्तकला महासंघ बीचको साझेदारीमा हस्तकला सम्बन्धी पेशाको क्षेत्रमा विकास समिती गठन आदेश, २०८० को दफा ७(ङ) बमोजिम औधोगिक प्रतिष्ठान वा उद्योगी संघ÷संस्था वा तालिम प्रदायक सस्थाहरुसँगको समन्वय र सहकार्यमा रोजगारउन्मूख सीप विकास तालिम, उद्यमशिलता विकास तालिम र प्रशिक्षक प्रशिक्षण तालिम सञ्चालन गर्न यो समझदारी पत्र तयार गरिएको हो ।