काठमाडौं । साताको पहिलो कारोबार दिन नेप्से परिसूचक ५६.०९ विन्दुले बढेर २६५३.५८ अंकमा रोकिएको छ । आइतबार नेप्से २.१५ प्रतिशतले बढेको हो । सबै समूहका सूचक बढेका छन् । फाइनान्स समूहमा सबैभन्दा बढी तेजी आएको छ । उत्पादनमूलक समूह पनि ३ प्रतिशतभन्दा बढीले वृद्धि भएको छ ।

यस दिन बजार बढ्दा फाइनान्स उपसमूहमा लगानीकर्ताहरुको उच्च आकर्षण देखिएको छ। १३ उपसमूहमध्ये यस दिन फाइनान्स उपसमूहको परिसूचक सर्वाधिक ६.३० प्रतिशत बढेको छ। सबै फाइनान्स कम्पनीहरुको शेयरमूल्य बढेसँगै यस उपसमूहको परिसूचक पनि उच्च दरमा बढ्न पुगेको हो।

गत बुधबार ६ अर्ब ७७ करोडको शेयर खरिदबिक्री भएको बजारमा यस दिन ३०८ स्टकको ६९ हजार ८६० पटकको कारोबारमा ६ अर्ब १३ करोड ८२ लाख ६ हजार रुपैयाँ बराबरको १ करोड ५० लाख ४६ हजार कित्ता शेयर खरिदबिक्री भएको छ।

त्यस्तै, यस दिन उत्पादन तथा प्रशोधन उपसमूहको परिसूचक ३ प्रतिशतभन्दा बढी बढेको छ भने बैंकिङ्ग, विकास बैंक र जलविद्युत उपसमूहको परिसूचक २ प्रतिशतभन्दा बढी बढेको छ।

कारोबार रकमका आधारमा आज साहस उर्जा लिमिटेड शीर्ष स्थानमा रहेको छ। सो कम्पनीको यस दिन ६३ करोड ८३ लाख रुपैयाँबराबरको शेयर खरिदबिक्री भएको छ। त्यस्तै, यस दिन एनआरएन इन्फ्रास्ट्रक्चर एण्ड डेभलपमेन्टको साढे २५ करोड रुपैयाँबराबरको शेयर कारोबार भएको छ । यता नेपाल फाइनान्सको करिब १६ करोडको शेयर किनबेच भएको छ।

न्यादी हाइड्रोपावरको शेयर सकारात्मक सर्किट लेभलमा कारोबार भएको छ। सो कम्पनीको शेयरमूल्य यस दिन ३० रुपैयाँ ५० पैसा बढेर ३३५ रुपैयाँ ६० पैसामा अन्तिम कारोबार भएको छ भने मध्य भोटेकाशी जलविद्युत कम्पनी र इष्टर्न हाइड्रोपावरको शेयरमूल्य साढे ९ प्रतिशतभन्दा बढी बढेको छ ।