काठमाडौं। नेकपा एमालेका युवा नेता तथा वागमति प्रदेश कमिटीका सल्लाहकार नारायण प्रसाद सापकोटाले एमालेको पक्षमा जनलहर बढेकाले आगामी प्रतिनिधिसभाको निर्वाचनको परिणाम पार्टीको पक्षमा आउने बताएका छन् ।

राष्ट्रिय युवा संघ नेपाल बकैया गाउँ कमिटी मकवानपुरले आयोजना गरेको प्रतिनिधिसभा केन्द्रित युवा भेला कार्यक्रममा बोल्दै विशेष अतिथि सापकोटाले बंगलादेशको निर्वाचनमा पनि नयाँ भनिने पार्टीहरुको बिजोग भएको बताए । उनले नेपालका वालेन्द्रको जस्तो धेरै फलोर्स भएका एकजना निर्वाचनमा उठेको र उनको बिजोग भएको बताए । काठमाडौं महानगरपालिकाका निवर्तमान मेयर वालेन्द्र साह (वालेन) झापा–५ बाट उम्मेदवार बनेका छन् । त्यही क्षेत्रमा पूर्वप्रधानमन्त्री तथा एमाले अध्यक्ष केपी शर्मा ओली पनि उम्मेदवार रहेका छन्।

‘बंगलादेशमा हल्ला गरेको भए पनि जम्मा ३ सय सिटमा ६ सिटमात्रै’

एमालेको वागमति प्रदेश कमिटीका निवर्तमान प्रदेश कमिटी सदस्यसमेत रहेका सापकोटाले ती नयाँ पार्टीले दुईतिहाई सिट ल्याउँछौं भनेर बंगलादेशमा हल्ला गरेको भए पनि जम्मा ३ सय सिटमा ६ सिटमात्रै आएको बताए । उनले निर्वाचन हारिन्छ भनेर उनीहरुले पटकपटक निर्वाचन सार्ने प्रयास पनि गरेको बताए । सापकोटाले यही अवस्था नेपालमा आउने दाबी गरे ।

‘केही नयाँ भन्नेहरुले के हल्ला फिजाँएका रहेछन् भने तपाइको छोरा विदेशमा छन्, श्रीमान विदेशमा छन् स्वदेश फर्काउनुपर्छ कि पर्दैन’ सापकोटाले भने ‘ अर्को कुरा यहाँ बसिरहेका युवालाई तपाई विदेश जाने कि स्वदेशै बस्ने मन छ पनि भनेका रहेछन् ।’ उनले यस्ता विषयमा हरेक मानिसलाई सचेत गराउनुपर्ने बताए । उनले नयाँ पार्टीको सिद्धान्त र एजेण्डा केही नभएको पनि बताए । राष्ट्रिय स्वतन्त्र पार्टी (रास्वपा) प्रति लक्षित गर्दै त्यो पार्टीले भनेजस्तो उम्मेदवार पनि नपाएको बताए ।

उनले देश बचाउने र देश जलाउनेबीचको यो निर्वाचन भएको पनि बताए । एमालेको नारा ‘सुखी नेपाली, समृद्ध नेपाल’ भएको भन्दै उनले बजारमा आएका भ्रमको पछि नलाग्नसमेत सबैलाई आग्रह गरे ।

बकैया गाउँपालिका मकवानपुर क्षेत्र नम्बर १ मा पर्दछ । यो क्षेत्रबाट एमालेका रामेश्वर राना उम्मेदवार बनेका छन् । सापकोटाले देशव्यापी रुपमा एमालेको पक्षमा माहोल बनेकाले त्यो अवस्थालाई जोगाइराख्न पनि सबैलाई आग्रह गरे ।

कार्यक्रमका प्रमुख अतिथि नेकपा एमालेका केन्द्रीय सदस्य तथा वागमति प्रदेशसभाका सांसद एकलाल श्रेष्ठ र जिल्ला कमिटी उपाध्यक्ष तथा भीमफेदी गाउँपालिका अध्यक्ष हिदम लामाले एमालेलाई जिताउने अभियानमा सबै सक्रिय रहनुपर्ने बताए ।  सांसद श्रेष्ठले एमालेलाई मत दिनुको मुख्य कारण पार्टीले सामाजिक न्याय, आत्मनिर्भर अर्थतन्त्र, रोजगारी, शिक्षा, स्वास्थ्य, कृषि र स्थानीय विकासलाई प्राथमिकता दिन्छ । उनले भने एमालेले संविधानको सर्वोच्चता, लोकतन्त्र, शान्ति प्रक्रिया र जनताको जीविकासँग जोडिएका मुद्दामा स्पष्ट नीति र कार्यक्रम अघि बढाएको छ त्यसैले सबैलाई सुर्य चिन्नमा मतदान गर्न आह्वान समेत गरे ।

कर्पाेरेट बजार

प्रकाशित समय : २०:०८ बजे