काठमाडौं । सिईडिबी हाइड्रोपावर कम्पनी लिमिटेडले बैशाख १७ गतेदेखि बैशाख २१ गते सम्म सर्वसाधारणलाई आईपीओ जारी गरेको कम्पनीको आईपीओमा १७ लाख भन्दा बढिको आवेदन परेको छ । आवेदन दिने अन्तिमसम्म १७ लाख ३६ हजार ७०१ जनाले आवेदन दिएका हुन् । आवेदन दिएका आवेदकहरुले २ करोड ६३ लाख ४५ हजार ५२६ कित्ताका लागि आवेदन दिएको बिक्री प्रबन्धक सनराइज क्यापिटल लिमिटेडले जानकारी दिएको हो । कम्पनीको आईपीओमा २ अर्ब ६३ करोड ४५ लाख ५२ हजार ६ सय रुपैयाँ बराबरको सेयर माग भएको कम्पनीले जनाएको छ ।

कम्पनीले शुक्रबारदेखि १०० रुपैयाँ अंकित दरका कूल २५ करोड १८ लाख २३ हजार रुपैयाँ बराबरको २५ लाख १८ हजार २३० कित्ता आईपीओ बिक्री खुल्ला गरेको हो । जसमा २ प्रतिशत अर्थात ५० हजार ३६५ कित्ता सेयर कर्मचारीका लागि, ५ प्रतिशत अर्थात १ लाख २५ हजार ९११ कित्ता सेयर सामूहिक लगानी कोषका लागि र बाँकी २३ लाख ४१ हजार ९५४ कित्तामा सर्वसाधारणको लागि छुट्याइएको छ ।

कम्पनीको आईपीओ नेपाल स्टक एक्सचेञ्जमा सूचीकृत भएको छैन् । यसै हप्ता कम्पनीको सेयर नेप्सेमा सूचीकृत गर्ने तयारी रहेको जनाएको छ, तर कुन दिन हुन्छ त्यो भने तोकिएको छैन् । कम्पनीको पहिलो शेयर कारोबारका लागि न्युनतम प्रतिकित्ता १३८ रुपैयाँ ७९ पैसा र अधिकतम ४१६ रुपैयाँ ३७ पैसासम्म ओपनिङ रेञ्ज पाउने सम्भावना छ । नेप्सेले हरेक कम्पनीको पहिलो कारोबारको लागि नेटवर्थको तीन गुणासम्म ओपनिङ रेञ्ज तोक्ने गर्दछ ।

२०७८ जेठ ९ गते प्रकाशित