रौतहट । रौतहटको राजदेवी नगरपालिका वडा नं. २ र ५ मा पर्ने गौर गंगापिपरा सडकखण्डको हजमिनियामा मुल सडक लामो समयदेखि नबन्दा स्थानियहरुले दुख पाएका छन् । ठेक्का सम्झौता भएको चार वर्ष वितिसक्दा पनि सडकले गति पाउन नसक्दा स्थानीयले सास्ती भोग्नु परेको हो । सडक डिभिजन कार्यालयको लागतमा निर्माण सम्पन्न हुने भनिएको सो सडक नबन्दा वर्षामा डुबानको समस्या र गर्मिमा धुलोको प्रदुषणका कारण स्थानिय पीडित बनेका छन्।

झण्डै सय मिटर लम्बाइको सो सडकमा दुवै साईडमा ढल बिचमा डिभाइडर सहितको डिजाइन रहेको छ । सडक निर्माणका लागी राजदेवी नगरपालिकाका मेयर धिरेन्द्र सिंहको आफन्तको नाममा रहेको फर्म एल एक्स कन्सट्रक्सनले कुल ९६ लाखको टेण्डर आर्थिक वर्ष ०७३/०७४ मा ५६ लाखमा सकार गरेको थियो । सडक विभागले गरेको सो टेण्डरको हाल सम्म कार्य सम्पन्न हुन सकेको छैन । बाटो बनाउने भन्दै भएको कालोपत्रे सडक खनेर सडकलाई अप्ठयारो बनाई ठेकेदार कम्पनीले काम बन्द गर्दा स्थानियले दुःख भोग्नु परेका स्थानिय युवा नेता चन्दन तिवारीले बताए ।

सडकको अलपत्र अवश्था वर्षौं बितिसक्दा पनि सरोकारवाला निकायले कुनै चासो नदिएको स्थानियको आरोप छ । यसै गरी सोहि सडकखण्डमा बनाइने भनिएको डिभाइडरमा समेत गुणस्तरहिन काम भएको स्थानियको आरोप रहेको छ । गुणस्तरहिन ढलान र प्लास्टरका कारण डिभाइडर दिगो नहुने स्थानियले बताए । न्यून गुणस्तरको बालुवा र सिमेन्ट प्रयोग गर्दै भइरहेको सो कामको छानबिन हुनुपर्ने स्थानियको माग रहेको छ । स्थानियहरुले सडक डिभिजन कार्यालय, राजदेवि नगरपालिकाको कार्यालय र जिल्ला प्रशासन कार्यालय रौतहटमा समेत अधुरो बाटो निर्माण कार्य सम्पन्न गराइ दिन बारम्बार निवेदन दिए पनि हाल सम्म कसैले चासो देखाएका छैनन ।

२०७८ जेठ २५ गते प्रकाशित