काठमाडौं । आर्थिक वर्ष २०८२/८३ को बजेट तथा कार्यक्रम तर्जुमा गर्ने प्रक्रियामा रहेको सरकारले सार्वजनिक सुझाव माग गरेको छ।

अर्थ मन्त्रालयले मंगलबार सार्वजनिक सूचना जारी गर्दै आम नागरिक, संघ–संस्था, विज्ञ, बुद्धिजीवी, व्यवसायी, पत्रकार, राजनीतिक दललगायत सबै सरोकारवालालाई आगामी बजेट र कार्यक्रममा समावेश गर्न लायक विषयमा सुझाव पेश गर्न अनुरोध गरेको हो।

सूचनामा भनिएको छ, “बजेट तथा कार्यक्रम तर्जुमा सम्बन्धी कार्य प्रारम्भ भइसकेको हुँदा आफ्ना अमूल्य सुझावहरू आगामी २०८२ वैशाख मसान्तभित्र पठाई सहयोग पुर्‍याइदिनुहुन हार्दिक अनुरोध छ।”

यसका लागि अर्थ मन्त्रालयको वेबसाइट (www.mof.gov.np) मा रहेको बजेट सुझाव फारम प्रयोग गर्न सकिनेछ। साथै, इमेलमार्फत पनि सुझाव पठाउन सकिने व्यवस्था गरिएको मन्त्रालयले जनाएको छ।

सरकारले समावेशी, जनमुखी र व्यवहारिक बजेट निर्माणका लागि नागरिक सहभागितालाई सशक्त बनाउँदै आएको छ।