काठमाडौं । नेपाल टेलिकमले आर्थिक वर्ष २०८०/८१ सम्मको बक्यौता महसुल रहेका ग्राहकलाई २०८३ साल पौष मसान्तभित्र रकम भुक्तानी गर्न आग्रह गरेको छ। कम्पनीले उक्त अवधिभित्र बक्यौता रकम बुझाएमा सेवामा लाग्ने जरिवाना छुट प्रदान गरिने जनाएको छ।

टेलिकमले जारी गरेको सार्वजनिक सूचनामा बक्यौता भएका ग्राहकलाई नजिकको दूरसञ्चार कार्यालयमा सम्पर्क गरी आवश्यक जानकारी तथा सहजीकरण लिन अनुरोध गरिएको छ। कम्पनीका अनुसार जरिवाना छुटको अवसरको उपयोग गरी समयमै बक्यौता भुक्तानी गर्न सबै ग्राहकलाई आग्रह गरिएको हो।

साथै, तोकिएको अवधिसम्म पनि बक्यौता रकम भुक्तानी नगर्ने ग्राहकको नाम, ठेगाना लगायतको विवरण कम्पनीको वेबसाइट तथा राष्ट्रिय पत्रपत्रिकामार्फत सार्वजनिक सूचना प्रकाशन गरी कानुनी प्रक्रिया अनुसार असुली कार्य अगाडि बढाइने नेपाल टेलिकमले चेतावनी दिएको छ। नेपाल टेलिकमले जरिवाना छुटको सुविधाको लाभ उठाई समयमै बक्यौता महसुल बुझाउन सबै सम्बन्धित ग्राहकलाई अनुरोध गरेको छ।