काठमाडौँ । एनआईसी एशिया बैंक लिमिटेडको २८औं वार्षिक साधारण सभा सोमबार काठमाडौं भद्रकालीस्थित आर्मी अफिसर्स क्लबमा सम्पन्न भएको छ।

सभाले आर्थिक वर्ष २०८१/८२ को सञ्चालक समितिको प्रतिवेदन, लेखापरीक्षकको प्रतिवेदन तथा २०८२ असार मसान्तसम्मको वासलात, नाफा–नोक्सान हिसाब र नगद प्रवाह विवरणसहितका वार्षिक वित्तीय विवरणहरू पारित गरेको छ।

सभाले सञ्चालक समितिको प्रस्तावअनुसार बैंकको चुक्ता पुँजीको २:१ अनुपातमा हकप्रद शेयर जारी गर्ने प्रस्तावलाई आवश्यक नियामक स्वीकृति प्राप्त भएपछि कार्यान्वयन गर्ने गरी स्वीकृति प्रदान गरेको छ। यससँगै बैंकको पुँजी संरचना सुदृढ बनाउने दिशामा महत्वपूर्ण निर्णय भएको बताइएको छ।

त्यसैगरी सभाले अन्य विभिन्न प्रस्तावहरू पनि पारित गरेको छ। संस्थागत प्रतिनिधित्व र सुशासन सुदृढीकरणका उद्देश्यसहित सञ्चालक समितिमा नयाँ सदस्यहरूको चयन पनि गरिएको छ।

निर्वाचन प्रक्रियाबाट संस्थापक शेयरधनी समूहबाट अशोक कुमार अग्रवाल, रामचन्द्र संघई र जयन्त कुमार अग्रवाल निर्विरोध निर्वाचित भएका छन्। यस्तै सर्वसाधारण शेयरधनी समूहबाट आदित्य कुमार अग्रवाल, केशव प्रसाद लम्साल र अनुपा प्रधान राजभण्डारी निर्विरोध चयन भएका छन्।