काठमाडौं । हिमालयन अर्गनाइजेशनअन्तर्गतको आयाम इन्टरकन्टिनेन्टल प्रालिले चीनको प्रतिष्ठित अटो निर्माता डोङफेङका विद्युतीय बस नेपालमा सार्वजनिक गर्ने भएको छ। कम्पनीले भृकुटीमण्डपमा आयोजना हुने नाईमा अटो एक्स्पो मा डोङफेङका दुई बस मोडल पहिलोपटक नेपाली बजारमा सार्वजनिक गर्ने जनाएको छ।

कम्पनीका अनुसार एक्स्पोमा ७.२ मिटर लम्बाइका २६ देखि ३० सिट क्षमताका विद्युतीय बस प्रदर्शन गरिनेछ। साथै, निकट भविष्यमा ९ मिटर र १२ मिटर लम्बाइका ३८ र ५२ सिट क्षमताका बस पनि नेपाली बजारमा ल्याउने तयारी भइरहेको छ।

सन् १९६९ मा स्थापना भएको डोङफेङ चीन सरकारको स्वामित्वमा रहेको अग्रणी अटोमोबाइल कम्पनी हो। कम्पनीले यात्रुवाहक सवारी, बस, ट्रक, विद्युतीय सवारी तथा व्यावसायिक सवारी उत्पादन गर्दै आएको छ। हाल डोङफेङका उत्पादन विश्वका १०० भन्दा बढी देश मा निर्यात हुँदै आएका छन्।

नेपालमा यसअघि नै डोङफेङका ट्रक, कार र माइक्रोबस बिक्री हुँदै आएका छन्। पछिल्लो समय सरकारले ठूला विद्युतीय बसलाई प्राथमिकता दिने नीति लिँदै गएको तथा सार्वजनिक यातायात क्षेत्रमा विद्युतीय बसको माग बढेकाले यो ब्रान्डका बस नेपाली बजारमा ल्याइएको आयाम इन्टरकन्टिनेन्टलले जनाएको छ।

कम्पनीले बसको मूल्य र विस्तृत प्राविधिक विवरण एक्स्पोमै सार्वजनिक गर्ने जनाएको छ। साथै, हाल बजारमा उपलब्ध समान श्रेणीका बसभन्दा प्रतिस्पर्धी मूल्य मा यी बस उपलब्ध गराइने दाबी गरिएको छ। एक्स्पो अवधिमा बुकिङ गर्ने ग्राहकका लागि विशेष छुट को व्यवस्था पनि गरिने कम्पनीले जनाएको छ।

बिक्रीपछिको सेवा तथा स्पेयर पार्ट्सको सुविधा हिमालयन अर्गनाइजेशनअन्तर्गतका शाखा तथा डिलर नेटवर्कमार्फत देशका विभिन्न सहरमा उपलब्ध गराइने कम्पनीको भनाइ छ।