काठमाडौँ । मंगलबार शेयर बजारमा उछाल आएको छ । नेप्से ५३.४४ अंकले बढेर हालसम्मकै उच्च बिन्दूमा पुगेको छ । साताको पहिलो दिन आइतबार ५०.१३ अंकले बढेर नेप्से २९०६.८९ अंकमा पुगेको थियो भने दोस्रो दिन हिजो सोमबार ०.२१ अंकले बजार घटेको थियो । आज बजार १.८४ प्रतिशतले बढ्दा परिसूचक २९६०.१४ अंकमा उक्लिएको छ । आज २१८ कम्पनीका ३ करोड ५७ लाख ३ सय ७४ कित्ता शेयर किनेबेच हुँदा १६ अर्ब ९५ करोड १२ लाख ९९ हजार ४० रुपैयाँ बराबरको कारोबार भएको छ ।
आज होटल्स एण्ड टुरिजम समूह १६.४५ अंक, लघुवित्त समूह २४.२१ अंक र लगानी समुह ०.९३ अंकले घटेका छन् बाँकी समूहमा हरियाली छाएको छ । आज सबैभन्दा बढी जीवन बीमा समूह ६६८.५७ अंकले बढेको नेप्सेले जनाएको छ ।

आज विभिन्न ३६ कम्पनीका लगानीकर्ताले ९ प्रतिशत भन्दा बढी नाफा कमाएका छन् । ती मध्ये ७ कम्पनीको शेयर मूल्य १० प्रतिशतले बढेको हो । आज हिमालयन जनरल इन्स्योरेन्स, गोर्खाज फाइनान्स, श्री इन्भेष्टमेन्ट फाइनान्स, जानकी फाइनान्स, सांग्रिला डेभलपमेन्ट बैंक, मुक्तिनाथ विकास बैंक र ग्रीन डेभलपमेन्ट बैंकका लगानीकर्ताले १० प्रतिशत नाफा कमाएको नेप्सेले जनाएको छ ।

आज मेरो माइक्रोफाइनान्स वित्तीय संस्थाले लगानीकर्ताले सबैभन्दा बढी २.८५ प्रतिशतले घाटा व्यहोरेका छन् । आज पनि नेपाल पुनर्बीमा कम्पनीको उच्च कारोबार भएको छ । पुनर्बीमा कम्पनीको १ अर्ब ६ करोड ६४ लाख ६४ हजार ७ सय २१ रुपियाँ बराबरको शेयर किनबेच भएको हो ।

२०७८ जेठ २५ गते प्रकाशित