काठमाडौं । प्लाष्टिक झोला आयात, उत्पादन र बिक्रीमा प्रतिबन्ध लगाइने भएको छ । अब भदौ १ गतेदेखि ४० माइक्रोनभन्दा कम पातलो प्लाष्टिक उत्पादन, आयात, बिक्री तथा प्रयोग गरे दण्डित गरिने वातावरण विभागले जनाएको छ।

विभागले आज मंगलबार सूचना जारी गर्दै यसभन्दा अघि नै लगाइएको प्रतिबन्धले केही असर नगरेको पाइएकाले आगामी भदौ १ गतेदेखि भने कडा रूपमा प्लाष्टिक झोलाको प्रयोग गर्न तथा उत्पादन र आयात गर्न नदिइने जनाएको हो ।

अनुगमनका क्रममा निषेधित प्लास्टिकका झोला आयात, भण्डारण, बिक्री वितरण र प्रयोग गरिएको पाइएमा वातावरण संरक्षण ऐन, २०७६ र वातावरण संरक्षण नियमावली, २०७७ अनुसार अर्थात करिब १ लाख सम्म जरिवाना र उत्पादन तथा आयात गर्ने कम्पनीलाई ५ वर्षसम्म कालोसूचीमा राख्ने व्यवस्था छ ।

यसका साथै, अदालती कारवाही र जेल सजायसम्म हुने पनि भनिएको छ । नेपाल सरकारबाट २०७८ असोज १९ गते राजपत्रमा सूचना प्रकाशित गरी ४० माइक्रोनभन्दा पातलो प्लाष्टिक झोला उत्पादन, आयात, बिक्री तथा प्रयोगमा प्रतिबन्ध लगाइएको थियो ।

सो नियमलाई निरन्तरता दिन नसक्दा पुनः भदौ १ गतेबाट सोहि प्रक्रिया अघि सारिएको विभाग बताउँछ ।

यो २०७८ माघ १७ गतेको मन्त्रिपरिषद्‍को निर्णयबाट पारित भएको उक्त प्लाष्टिक झोला प्रयोगमा प्रतिबन्ध सम्बन्धि कार्ययोजना स्वीकृत भइ कार्यान्वयनमा रहेको पनि विभागले सूचनामा जनाएको छ ।