काठमाडौं । सधैं एमालेको एकलौटी वर्चस्व रहँदै आएको काभ्रे पनौती १ मा कांग्रेसले सानदार जितेको छ ।

स्थानीय तहको निर्वाचन अन्तर्गत एमालेको लालकिल्लाको रुपमा रहँदै आएको पनौती १ को वडा अध्यक्षमा कांग्रेसका जयकुमार लामाले सानदार जितेका छन् ।

वडामा प्यानलसहित सबै पदमा कांग्रेसका उम्मेदवार विजयी भएका हुन् ।

१५९३ मत ल्याएर कांग्रेसका लामा विजयी भएका छन् । पराजित एमालेका वीरमान लामाले १३६८ मत ल्याए । एमालेकाे लालकिल्लाकाे रूपमा परिचित वडामा कांग्रेसका लामाले २२५ मतको सहज जित हात पारेका हुन् ।

२०४६ सालयताका सबै चुनावमा एमालेकाे एकलौटी र एकछत्र प्रभाव रहेको पनौती १ रयालेमा तीन हजार एक सय मतगणनाका क्रममा लामा एकपटक पनि पछाडि नपरी जित्न सफल भएका हुन् ।

पनाैती नगरपालिकामा सत्ता गठबन्धन दलबीच मेयर र उपमेयरमा चुनावी तालमेल भएकाे थियाे । केही सदस्यमा पनि तालमेल भए पनि वडाध्यक्षमा भने प्रभावकारी तालमेल भएकाे भने थिएन ।

तर, कांग्रेस उम्मेदवारलाई गठबन्धनका माओवादी केन्द्र, नेकपा एकीकृत समाजवादीसहितका दलले समर्थन गरेका थिए । एमाले विभाजनपछि रयालेमा नेकपा एसकाे प्रभाव थाेरैमात्र छ ।