काठमाडौं । गत आर्थिक वर्षको चौथो त्रैमाससम्म हाथवे इन्भेष्टमेन्ट नेपाल लिमिटेडले उत्साहजनक प्रगति गरेको छ । उक्त अवधिसम्म कम्पनीको नाफा ४५०.५९ प्रतिशतले बढेको छ ।

गत आर्थिक वर्षको अन्त्यसम्ममा कम्पनीले ८ करोड ३९ लाख रुपैयाँ खुद नाफा आर्जन गरेको छ। अघिल्लो आर्थिक वर्षको सोही अवधिसम्ममा कम्पनीले १ करोड ५२ लाख रुपैयाँ खुद नाफा कमाएको थियो।

सञ्चालन आम्दानी बढ्दा नाफामा सुधार आएको हो । कम्पनीको सञ्चालन आम्दानी ६७.१८ प्रतिशत बढेर २५ करोड ८२ लाख रुपैयाँ पुगेको छ । अघिल्लो आर्थिक वर्षको सोही अवधिमा कम्पनीको सञ्चालन आम्दानी १५ करोड ४४ लाख रहेको थियो ।

कम्पनीको कुल खर्च समीक्षा अवधिमा १७.२३ प्रतिशत घटेर ११ करोड ७९ लाख रुपैयाँमा खुम्चिएको छ ।

चुक्ता पुँजी १ अर्ब २८ करोड ७० लाख रुपैयाँ रहेको हाथवेको रिटेन्ड अर्निङमा ३७ करोड २१ लाख रुपैयाँ रहेको छ । उक्त रकमबाट यसले सेयरधनीलाई २८ प्रतिशतसम्म लाभांश दिन सक्छ ।

नाफासँगै कम्पनीको प्रतिसेयर आम्दानी पनि बढेको छ। समीक्षा अवधिमा कम्पनीको यस्तो आम्दानी २ रुपैयाँ ५२ पैसा बढेर ३ रुपैयाँ २६ पैसा पुगेको छ। असार मसान्तसम्ममा कम्पनीको प्रतिशेयर नेटवर्थ ७७ रुपैयाँ ८६ पैसा रहेको छ भने मूल्य आम्दानी अनुपात ३१०.४४ गुणा रहेको छ।