काठमाडौं । काठमाडौं उपत्यकामा जारी निषेधाज्ञालाई थप एक साता लम्ब्याउने तयारी भएको प्रशासनले जनाएको छ । आज उपत्यकाका सिईओहरुको बैठक निषेधाज्ञा अझै कसरी कडाई गर्ने भन्नेमा केन्द्रीत रहने भएको हो । आइतबार मन्त्रिपरिषद् बैठकले १५ दिन थप निषेधाज्ञा जारी गर्न प्रशासनलाई निर्देशन दिइसकेको छ ।

उद्यपी लकडाउन बढाउनका लागि भोली नै अर्काे बैठक बस्ने छ । काठमाडौं उपत्यकामा पहिलो चरणको निषेधाज्ञा २२ गते राति १२ बजे सकिँदै छ । ‘२२ गतेसम्म सोही निषेधाज्ञा कायम रहन्छ । २२ गते नै अर्को बैठक बसी निषेधाज्ञा लम्ब्याउने योजना तय गरेका छौँ। अब निषेधाज्ञा एक सात लम्ब्याउनेबारे कुनै दुविधा छैन,” काठमाडौंका प्रमुख जिल्ला अधिकारी कालीप्रसाद पराजुलीले भने, ‘‘निषेधाज्ञामा कसरी कडाइ गर्न सकिन्छ भन्नेबारे छलफल गरी निर्णय लिने हो । निषेधाज्ञाको संरचना उस्तै भए पनि त्यसलाई आवश्यक थप कडाइ गर्ने गृहकार्यमा जुटेका छौँ ।”

जिल्ला प्रशासन कार्यालय काठमाडौंले उपत्यकामा निषेधाज्ञा थप कडाई गर्ने तयारी गरेको छ । निषेधाज्ञामा कसैले आदेश उल्लङ्घन गरे त्यसलाई होल्ड नगरी कारबाही गरिने जनाएको छ । संक्रामक रोग ऐन २०२० र स्थानीय प्रशासन ऐन २०२८ अनुसार निषेधाज्ञा उल्लङ्घन गर्नेलाई कारबाही गरिने जनाइएको छ । अहिलसम्म लकडाउनको उल्लंघन गर्नेलाई होल्ड गराएपनि अब भने जरीवाना तिराउने तयारीमा प्रशासन रहेको छ । प्रशासनले राजधानीका सबै प्रहरी वृत्तमा कारबाही रसिद समेत पठाईसकेका छन् ।
उनले आजसम्म सचेत गराउँदा पनि निषेधाज्ञा उल्लङ्घन गरी घर बाहिर निस्कनेलाई संक्रामक रोग ऐन २०२० अनुसार कारबाही गरिने जानकारी दिए ।

प्रमुख जिल्ला अधिकारी पराजुली काठमाडौंमा मास्क नलगाउनेलाई जरिबाना गर्न प्रहरीलाई रसिद पठाइसकेको बताएका हुन्।