राष्ट्रपति र प्रधानमन्त्रीविरूद्धका १९ रिट सर्वोच्चको पेशीमा
वि.सं.२०७८ जेठ १३ बिहीवार
काठमाडौं । प्रतिनिधि सभा विघटन र मध्यावधि निर्वाचन घोषणा प्रकरणका बारेमा सर्वोच्च अदालतमा दायर भएका १९ वटाको पेशी आज (बिहीबार) का लागि तोकिएको छ ।
राष्ट्रपतिबाट भएको प्रतिनिधि सभा विघटन बदर र संविधानको धारा ७६ (५) बमोजिम प्रधानमन्त्री नियुक्त गर्नुपर्ने मागसहित सर्वोच्चमा रिट परेका थिए ।
यस सम्बन्धी कूल ३० वटा रिट परेपनि आजका लागि १९ रिटको पेशी तोकिएको हो ।
३० मध्ये ४ वटा रिटमा वर्तमान प्रधानमन्त्री केपी शर्मा ओलीलाई नै उपधारा ५ बमोजिम प्रधानमन्त्री नियुक्त गर्नुपर्ने माग गरिएको र बाँकी रिटमा शेरबहादुर देउवालाई प्रधानमन्त्री नियुक्त गर्नुपर्ने माग गरिएको सर्वोच्च स्रोतले जानकारी दिएको छ ।
विपक्षी गठबन्धनका तर्फबाट विघटित प्रतिनिधि सभाका बहुमत सांसदले दायर गरेको रिटमा भने कांग्रेस सभापति शेरबहादुर देउवालाई प्रधानमन्त्री नियुक्त गर्नुपर्ने माग गरिएको हो ।
१९ वटा रिटमा प्रतिनिधि सभा विघटनलाई कार्यान्वयन नगर्न अन्तरिम आदेश माग गरिएको छ ।
२०७८ जेठ १३ गते प्रकाशित
प्रकाशित समय : ०५:५३ बजे
