काठमाडौं । नेकपा एमालेका वरिष्ठ नेता माधवकुमार नेपालले राष्ट्रपति विद्यादेवी भण्डारी र प्रधानमन्त्री केपी शर्मा ओलीले संविधानलाई कुल्चीएको भन्दै यसका विरुद्ध संघर्षका लागि आह्वान गरेका छन् ।
एमालेको नवौं महाधिवेशनको मार्ग निर्देशन र पार्टी विधानको रक्षार्थ सञ्चालित अभियानकर्ता समूहको तर्फबाट नेपालले शनिबार प्रेस विज्ञप्ति जारी गर्दै प्रतिनिधिसभाको विघटन प्रतिगमनकारी कार्य भएकाले यसविरुद्ध एकताबद्ध हुन नेपालले सबैलाई आह्वान गरेका हुन् ।

नेपालले भनेका छन्, ‘दुई दुई पटक सविधानसभाको निर्वाचन गरी देशले ठूलो मूल्य चुकाएर जारी भएको नेपालको संविधानमाथि प्रधानमन्त्री ओलीले तानाशाही बुट बजार्दै त्यसलाई धुजाधुजा पारेका छन् । प्रधानमभन्त्री र राष्ट्रपतिको यो संविधान र लोकतन्त्र विरोधी कार्यको हामी घोर निन्दा र भर्त्सना गर्दछौं ।’

साथै नेपालले कांग्रेस सभापति शेरबहादुर देउवाको पक्षमा प्रतिनिधिसभाको १ सय ४९ सांसदको हस्ताक्षर रहेको र देउवालाई प्रधानमन्त्री नियुक्त गर्नुपर्ने बाध्यात्मक व्यवस्था रहेको दाबी गरेका छन् ।

२०७८ जेठ ८ गते प्रकाशित