काठमाडौँ । लिलामीमा राखिएका ४ कम्पनीका सेयर खरिदका लागि बोलपत्र पेस गर्ने आज अन्तिम दिन रहेको छ । प्रुडेन्सियल क्यापिटल म्यानेजमेन्ट कम्पनीले लिलामीमा राखेको प्रभु बैंक, प्राइम कमर्सियल बैंक, नेसनल लाइफ इन्स्योरेन्स र नेपाल ग्रामीण विकास लघुवित्तका सेयरमा आजसम्म मात्रै बोलपत्र पेस गर्न सकिने छ।

प्रुडेन्सियल क्यापिटलले गत भदौ ३१ गतेबाट यी ४ कम्पनीमा रहेको आफ्नो स्वामित्वको कुल २ लाख ८५ हजार कित्ता संस्थापक सेयर लिलामीमा राखेको छ। जसमा प्रभु बैंकको ५० हजार कित्ता, प्राइम बैंकको १ लाख कित्ता, नेसनल लाइफको १ लाख र नेपाल ग्रामीण विकास लघुवित्तको ३५ हजार कित्ता रहेका छन्।

लिलामीमा राखिएको सेयरमा विद्यमान संस्थापक वा जोकाही व्यक्ति तथा संघसंस्थाले बोलपत्र पेस गर्न सक्नेछन्। बोलपत्र पेस गर्दा न्यूनतम २ हजार कित्ताका लागि आवेदन दिनुपर्नेछ। अधिकतमका लागि भने हद लाग्ने छैन।

लिलामीमा राखिएको प्रभु बैंकको न्यूनतम मूल्य प्रतिकित्ता २०५ रुपैयाँ, प्राइम बैंकको २०८ रुपैयाँ, नेसनल लाइफको ४२१ रुपैयाँ र नेपाल ग्रामीण विकास लघुवित्तको ४०० रुपैयाँ तोकिएको छ। बोलपत्र पेस गर्दा न्यूनतम मूल्य वा सोभन्दा बढी बोलकबोल गर्नुपर्नेछ।

बोलपत्र धितोपत्र बिक्री प्रबन्धक एनआईसी एसिया क्यापिटलको काठमाण्डौ बबरमहलस्थित कार्यालयमा पेस गर्नुपर्नेछ।
२०७८ असोज ८ गते प्रकाशित