काठमाडौँ । नेपाल राष्ट्र बैंक सहित नेपालका थप १५ वटा वाणिज्य बैंकको सिस्टम ह्याक गर्ने चेतावनि आएको छ । ह्याकरले केन्द्रिय बैंक तथा अन्य बैंकका अधिकारीलाई ईमेल, म्यासेज तथा फोन गरेर बैंक ह्याक गरी पैसा चोर्ने धम्की आएको हो ।

ह्यकरले केन्द्रिय बैंकका प्रबक्ता ढकाल र सह प्रबक्ता नारायणप्रसाद पौडेल र नबिल बैंकका प्रमुख कार्यकारी अधिकृत अनिल केशरी शाहलाई बैंकिङ्ग सिस्टम ह्याक गर्ने भन्दै धम्किपुर्ण इमेल पठाएको छ । साथै उक्त नोटिसमा ह्याकरले यस कुरालाई मजाकको रुपमा नलिन समेत भनेको छ।

पत्रमा नेपाल राष्ट्र बैंकसहित १६ वटा बैंकको प्रणाली ह्याक गरेर पैसा चोर्ने धम्की दिइएको छ । ह्याकरले पठाएको भनिएको पत्रमा नेपाल राष्ट्र बैंक, कुमारी बैंक, नेपाल बैंक, नबिल बैंक, राष्ट्रिय बाणिज्य बैंक, माछापुच्छ्रे बैंक, एनएमबि बैंक, एनआइसी एसिया बैंक, बैंक अफ काठमाण्डू, सिटिजन्स बैंक, सानिमा बैंक, नेपाल एसबीआइ बैंक, एभरेष्ट बैंक, नेपाल इन्भेष्टमेन्ट बैंक र हिमालय बैंकको नाम उल्लेख छ।

यद्यपी केन्द्रीय बैंकले भने यो विषयलाई लिएर आतंकित हुनु नपर्ने जानकारी गराएको छ ।
केन्द्रीय बैंकका प्रवक्ता देव कुमार ढकालले यो फेक म्यासेज भएका कारण यसको पछाडी लाग्नु नपर्ने बताए । उनले भने ‘यो फेक म्यासेज हो, यसको पछाडी लाग्नु कुनै जरुरी छैन । हाम्रा सिस्टमहरु त्यत्ति कमजोर छैनन् ।’ उनले थपे ‘ हामीले सम्पुर्ण सिस्टमहरु चेक पनि गरिसक्यौं। राष्ट्र बैंक लगायत सम्पुर्ण बैंकको सिस्टम निगरानीमा छन् अहिलेसम्म ह्याक गर्न लागेको संकेत देखिएको छैन ।’

२०७८ साउन ७ गते प्रकाशित