काठमाडौं । एनसेल आजियाटा लिमिटेडले सूचना सुरक्षा र डेटा गोपनीयता सम्बन्धी अन्तर्राष्ट्रिय मापदण्ड आइएसओ २७००१ः२०२२ (आईएसएमएस) र आइएसओ २७७०१ः२०१९ (पिआईएमएस) को मान्यता सफलतापूर्वक नविकरण गराएको छ ।
यस नविकरणसँगै एनसेलले ग्राहकको सूचना सुरक्षा र डेटा गोपनीयतामा आफ्नो प्रतिबद्धता थप मजबुत बनाएको छ । गत वर्ष यी दुवै मान्यता प्राप्त गर्ने एनसेल नेपालकै पहिलो दूरसञ्चार कम्पनी बनेको थियो । मान्यता नविकरणले कम्पनीले अन्तर्राष्ट्रिय मापदण्डअनुसार ग्राहकको व्यक्तिगत तथा संवेदनशील जानकारी सुरक्षित राख्दै आएको पुष्टि गर्दछ ।
नविकरण प्रक्रियाअन्तर्गत आइएसओद्वारा तोकिएको स्वतन्त्र निकायमार्फत सर्भेलेन्स अडिट गरिएको थियो । अडिटका क्रममा एनसेलका सूचना सुरक्षा र डेटा गोपनीयता सम्बन्धी सुशासन प्रक्रिया आइएसओ मापदण्डअनुसार पूर्ण रूपमा कार्यान्वयनमा रहेको पुष्टि भएको छ । यी मान्यताहरू आगामी एक वर्षसम्म मान्य रहनेछन् । नविकरण भएका मान्यताहरूको दायराभित्र ग्राहक डेटा सेन्टर, ग्राहक सेवा तथा आईटी सर्भिसेज रहेका छन् । यसले एनसेलले गोपनीयता सुनिश्चित गर्न उच्चतम अन्तर्राष्ट्रिय अभ्यासहरू अपनाएको स्पष्ट गर्दछ ।
आइएसओ २७००१ मान्यताले एनसेलले ग्राहक तथा साझेदारका डाटालाई साइबर आक्रमण, सूचना चुहावट तथा अनधिकृत पहुँचबाट जोगाउन प्रभावकारी सुरक्षा उपायहरू कार्यान्वयन गरेको सुनिश्चित गर्दछ । त्यसैगरी आइएसओ २७७०१ मान्यताले व्यक्तिगत डेटा सुरक्षा, उल्लंघनको जोखिम न्यूनीकरण तथा गोपनीयतासम्बन्धी उत्कृष्ट अन्तर्राष्ट्रिय अभ्यासको पालना भएको प्रमाणित गर्दछ ।
यी अन्तर्राष्ट्रिय मान्यताहरूले ग्राहकहरूलाई आफ्ना व्यक्तिगत र संवेदनशील जानकारी एनसेलमा सुरक्षित रहेको भरोसा दिलाउनुका साथै कम्पनीको पारदर्शिता, जवाफदेहिता र डेटा सुरक्षालाई व्यवसायको केन्द्रमा राखिएको सन्देश दिन्छन् । एनसेलका प्रणालीहरू सम्भावित अवरोध न्यूनिकरण, जोखिम व्यवस्थापन तथा व्यवसाय निरन्तरता सुनिश्चित गर्ने गरी डिजाइन गरिएका छन् । कम्पनीले आफ्ना सबै सेवा र प्रक्रियामा डेटा सुरक्षा र गोपनीयतालाई उच्च प्राथमिकता दिँदै आएको जनाएको छ ।
