भक्तपुर । दशैं नजिकिएसँगै भक्तपुरको सिर्जनानगरस्थित खुल्ला मैदानमा खसी, बोका र च्याङ्ग्राको व्यापार चहलपहल सुरु भएको छ ।

घटस्थापनाको दिनदेखि नै किसान तथा व्यापारीले विभिन्न स्थानबाट ल्याइएका खसी–बोका र च्याङ्ग्रा बिक्रीका लागि राखेका छन् ।

मुस्ताङको लोमान्थाङ गाउँपालिकाबाट च्याङ्ग्रा ल्याएका व्यापारी सौगात श्रेष्ठका अनुसार यसपटक करिब पाँच सय च्याङ्ग्रा ल्याइएको छ भने अझै तीन–चार सय ल्याउने तयारी भइरहेको छ ।

उनले भने, ‘हामीले घटस्थापनाको दुई दिन अघिदेखि नै व्यापार सुरु गरेका हौं । ग्राहक भने फुलपातीतिरै बढ्छन् । अहिले फाट्टफुट्ट मात्र बिक्री भइरहेको छ ।’

श्रेष्ठले ल्याएको च्याङ्ग्राको खुद्रा मूल्य प्रतिकिलो १ हजार २५० तोकिएको छ । गतवर्ष १ हजार ३५० सम्ममा बिक्री भएको भए पनि यसपटक मूल्य केही घटेको उनले बताए । ‘लगानी अहिलेसम्मै दुई करोड पुगेको छ । अझै थपिँदै जाँदा तीन–चार करोड पुग्छ होला,’ उनले भने

यसैगरी, धादिङबाट खसी ल्याएर व्यापार सुरु गरेका युवराज कार्की पहिलोपटक व्यवसायमा होमिएका हुन् । उनले हालसम्म २२ वटा खसी बिक्री गरिसकेका छन् । कार्कीका अनुसार गाउँमा किसानसँग प्रतिकिलो ५६० मा किनिएको खसी काठमाडौं आइपुग्दा तौल घट्ने भएकाले घाटा बेहोर्नुपरेको छ ।

‘यहाँ ७५० मा बिक्री गर्ने गर्छौं तर पहिलोपटक भएकाले खासै फाइदा भएको छैन,‘ उनले भने । साथै, सिर्जनानगरमा कर तिर्नुपर्ने भएपनि नगरपालिका पक्षबाट आधारभूत सुविधा नपाएको गुनासोसमेत उनले सुनाए । ‘न त खोरको व्यवस्था छ, न त शौचालय । बाहिरबाट पशु ल्याउँदा गाडी भाडा पनि महँगो पर्छ,’ कार्कीको भनाइ छ ।

उता, जोमसोमबाट करिब ६० वटा च्याङ्ग्रा ल्याएका व्यापारी ध्रुव सिलवालले भने दशैंको मुख्य दिनतिर व्यापार तात्ने विश्वास व्यक्त गरे । ‘फुलपातीदेखि अष्टमीसम्म च्याङ्ग्रा सटेज नै हुन्छ । अहिले त व्यापार हुने अवस्था छैन ।’ उनका अनुसार अहिले प्रतिकिलो १ हजार २५० मा बिक्री भइरहेको च्याङ्ग्राको मूल्य मागअनुसार १ हजार ४ सयसम्म पुग्ने सम्भावना छ ।

४० वर्षदेखि च्याङ्ग्रा व्यवसाय गर्दै आएका सिलवालले यसपटक दुई करोड भन्दा बढी लगानी गरेको बताए । ‘खाद्यान्नमा खसी पनि छैन, भेडा–च्याङ्ग्रा पनि छैन । त्यसैले यो पटक व्यापार सटेज हुने देखिन्छ,’ उनले भने । दशैं नजिकिँदै जाँदा भक्तपुरमा पशु बजारमा चहलपहल बढ्दै गएको छ । व्यापारीहरूका लागि यो समय जोखिमपूर्ण भए पनि अवसरले भरिएको मानिन्छ । ग्राहकतर्फ भने प्रारम्भिक दिनमा शिथिलता देखिए पनि फुलपाती नजिकिँदै जाँदा बजार थप रौनकिलो हु