काठमाडौँ । दशैँ तिहारको लागि आमसर्वसाधरणले आगामी साताबाटै नयाँ नोट सटही गर्न सक्ने भएका छन् । नेपाल राष्ट्र बैंकले दसैँतिहारलाई लक्षित गर्दै बैंक तथा वित्तीय संस्थाहरुलाई नयाँ नोट पठाएसँगै सर्वसाधारणले पाउने भएका हुन् ।

मुद्रा व्यवस्थापन विभागका प्रमुख रेवतीप्रसाद नेपालले दसैँतिहारका लागि बैंक तथा वित्तीय संस्थाहरुमा ३ अर्ब ६० करोड रुपैयाँबराबरको नयाँ नोट बजारमा पठाइसकेको बताए । उनले भने ‘बैंक तथा वित्तीय संस्थाहरुले नयाँ नोटको सहटी उनीहरुको समायानुकूल गर्न सक्नेछन्’ राष्ट्र बैंकले भने असोज ४ गतेबाट नयाँ नोटको व्यवस्था गर्नेछ।’

नयाँ नोट राष्ट्र बैंकको केन्द्रीय कार्यालयसहित सातवटै प्रदेशको प्रादेशिक कार्यालय सहटीको व्यवस्था गरिएको पनि नेपालले बताए।
यो वर्ष दशैं आउनुभन्दा एक महिनाअघि नै राष्ट्र बैंकले नयाँ नोट सटहीको सुविधा दिएसँगै यसअघिका वर्षजस्तो राष्ट्र बैंकको थापाथली वा बालुवाटार कार्यालयबाट नोट सटहीको काम बन्द गरेको छ ।

गत वर्षको कोरोना महामारीका कारण नोट सटहीको सुविधा रोकेपछि राष्ट्र बैंकले अव स्थायी रुपमै आफ्नो केन्द्रिय र क्षेत्रीय कार्यालयमार्फत् नयाँ नोट साट्ने सुविधा बन्द गरेको नेपालले बताए ।

यो सँगै अब बैंक तथा वित्तीय संस्थाले यस्ता नोट सटहीको जिम्मा पाउने छन् । दशैंमा नयाँ नोट साट्ने प्रचलन नेपालमा लामो समयदेखि चल्दै आएको छ । यही कारण यो वर्ष पनि गत सातादेखि नै बैंकहरुलाई नयाँ नोट उपलब्ध गराउन थालिएको राष्ट्र बैंकले जनाएको छ ।

राष्ट्र बैंकले अहिले नै पैसा दिएको भए पनि बैंकहरुले भने ग्राहकलाई पैसा बाँडेका छैनन् । बैंक तथा वित्तीय संस्थाले अहिले नयाँ नोट मौज्दात गरेर राखेका छन् । औपचारिक वितरण भने घटस्थापनादेखि गर्ने बैंकरले बताएका छन् । यद्यपि, माग्न आउने आफ्ना नियमित ग्राहकलाई भने अहिले पनि उपलब्ध गराइरहेको बैंकर बताउँछन् ।

राष्ट्र बैंकले बैंकहरुको एउटा शाखालाई कम्तिमा ५ करोड बराबरका दरले नयाँ नोट उपलब्ध गराएको जनाएको छ । विकास बैंकलाई ४ करोड र फाइनान्सलाई २ करोड बराबरको नोट उपलब्ध गराएको छ ।

‘एक व्यक्तिले बढीमा १८ हजार ५०० रुपैयाँसम्म नयाँ सटही गर्न पाउनेछन्’, नेपालले भने ‘रु ५, रु.१०, रु.२०, रु.५० र रु.१०० दरका एक–एक बन्डलका दरले १८ हजार ५०० सम्म साट्न पाउने सुविधा दिइएको हो।’

२०७८ भदौ २८ गते प्रकाशित