काठमाडौँ। नेपालको बैंकिङ क्षेत्रमा विकास बैंकहरूको तर्फबाट मुक्तिनाथ विकास बैंक लिमिटेडले एक अभूतपूर्व र ऐतिहासिक सफलता हासिल गरेको छ। आर्थिक वर्ष २०८२/८३ को चौथो त्रैमाससम्मको अपरिष्कृत वित्तीय विवरण सार्वजनिक गर्दै बैंकले १ खर्ब रुपैयाँभन्दा बढी कर्जा प्रवाह गर्ने नेपालकै पहिलो विकास बैंक बन्ने गौरव प्राप्त गरेको हो। वाणिज्य बैंकहरू सरहको ठूलो वित्तीय आकार र क्षमता प्रदर्शन गर्दै बैंकले वित्तीय बजारमा आफ्नो पकड अझ सुदृढ बनाएको छ।

समीक्षा अवधिमा बैंकको कुल कर्जा प्रवाह ३.३८ प्रतिशतले वृद्धि भई १ खर्ब ५० करोड ८८ लाख ३१ हजार रुपैयाँ पुगेको छ। अघिल्लो आर्थिक वर्षको सोही अवधिमा बैंकको कर्जा लगानी ९७ अर्ब २२ करोड ३२ लाख रुपैयाँमा सीमित थियो। १ खर्बको कोसेढुङ्गा पार गरेसँगै मुक्तिनाथले विकास बैंकहरूको टोलीमा आफूलाई अग्रस्थानमा उभ्याएको छ।

निक्षेप संकलनतर्फ पनि बैंकले उल्लेखनीय सुधार दर्ता गरेको छ। गत आर्थिक वर्षमा बैंकको कुल निक्षेप ५.२० प्रतिशतले बढेर १ खर्ब २३ अर्ब ५३ करोड ९४ लाख ४३ हजार रुपैयाँ पुगेको छ, जसले ग्राहकहरूको बैंकप्रतिको उच्च विश्वासलाई झल्काउँछ।

सार्वजनिक विवरण अनुसार बैंकले गत आर्थिक वर्षमा १ अर्ब ५१ करोड ८३ लाख ६१ हजार रुपैयाँ खुद नाफा आर्जन गर्न सफल भएको छ। यो नाफा अघिल्लो आर्थिक वर्षको १ अर्ब ५१ करोडभन्दा बढी हो, जुन अघिल्लो वर्षको १ अर्ब ३५ करोड ३ लाख ६० हजार रुपैयाँको तुलनामा १२.४४ प्रतिशतले बढी हो।

बैंकको खुद ब्याज आम्दानी ३.६३ प्रतिशतले बढेर ४ अर्ब ७४ करोड ३८ लाख ४९ हजार रुपैयाँ पुगेको छ भने कुल सञ्चालन आम्दानी ३.८९ प्रतिशतले वृद्धि भई ५ अर्ब ३९ करोड ८२ लाख ७ हजार रुपैयाँ पुगेको छ। विशेष गरी बैंकको सञ्चालन मुनाफामा २०.२३ प्रतिशतको उच्च वृद्धि भई २ अर्ब ४२ करोड २७ लाख ७ हजार रुपैयाँ कायम भएको छ।

खुद नाफा र सञ्चालन मुनाफामा आकर्षक सुधार देखिए तापनि बैंकको वितरणयोग्य मुनाफामा भने उल्लेख्य गिरावट आएको छ। अघिल्लो वर्ष १ अर्ब ३५ करोड ४१ लाख २ हजार रुपैयाँ रहेको वितरणयोग्य मुनाफा ५०.१० प्रतिशतले घटेर ६७ करोड ५७ लाख ५६ हजार रुपैयाँमा झरेको छ। यसैका आधारमा बैंकको लाभांश क्षमता ८.४५ प्रतिशतमा सीमित भएको छ।

त्यस्तै, चुक्ता पुँजी वृद्धि र वितरणयोग्य मुनाफामा आएको संकुचनका कारण प्रतिसेयर आम्दानी (इपीएस) मा सामान्य गिरावट आई १८.९८ रुपैयाँ कायम भएको छ। वित्तीय क्षेत्रमा समग्रमा देखिएको सुस्तताका कारण बैंकको खराब कर्जा अनुपात पनि अघिल्लो वर्षको २.९७ प्रतिशतबाट बढेर ४.७७ प्रतिशत पुगेको छ।