काठमाडौं । नेकपा (एमाले) का सांसद गणेश सिंह ठगुन्नाले नेपाल–भारत सीमा विवादका विषयमा प्रधानमन्त्रीको अभिव्यक्तिप्रति आपत्ति जनाएका छन् ।

मंगलबार बसेको प्रतिनिधिसभा बैठकमा बोल्दै सांसद ठगुन्नाले देशको सार्वभौमसत्ता, राष्ट्रिय स्वाभिमान र भौगोलिक अखण्डताको रक्षा गर्नु सरकारको प्रमुख दायित्व भएको बताएका हुन् ।

उनले भने, ‘देशको स्वाभिमान सार्वभौमसत्ता र भौगोकिक अखण्डताको रक्षा गर्ने दायित्व सरकारको हुन्छ । सबै देशको सरकारले आफ्नो देशको स्वविमानको रक्षा गर्दै भौगोलिक अखण्डताको रक्षा गर्ने कार्यलाई प्राथमिकतामा राखिएको हुन्छ ।’

उनले नेपाली पुर्खाहरूको संघर्षबाट नेपालको भौगोलिक अखण्डता र राष्ट्रिय अस्तित्व कायम भएको उल्लेख गरे ।

उनले कालापानी, लिपुलेक र लिम्पियाधुरासहित करिब चारसय वर्ग किलोमिटर नेपाली भूमि भारतले अतिक्रमण गरेको दाबी गरे ।

उनले उक्त क्षेत्रमा भारतीय सुरक्षा बलको उपस्थिति, सडक निर्माण तथा कैलाश–मानसरोवर यात्रा र तिब्बतसँगको व्यापार सञ्चालन भइरहेको बताए ।

उनले सीमा विवादजस्तो संवेदनशील विषयमा सरकारको धारणा स्पष्ट, तथ्यमा आधारित र राष्ट्रिय हितअनुकूल हुनुपर्नेमा जोड दिए ।

सांसद ठगुन्नाले सीमा अतिक्रमणको विषय समाधानका लागि नेपालले विशेष कूटनीतिक पहल गर्नुपर्ने बताए ।

उनले सीमा विवादजस्तो संवेदनशील विषयमा सरकारको धारणा स्पष्ट, तथ्यमा आधारित र राष्ट्रिय हितअनुकूल हुनुपर्नेमा जोड दिए ।