काठमाडौं । राष्ट्रिय वाणिज्य बैंक लिमिटेडले आफ्नो वार्षिकोत्सवको सुखद अवसरमा नयाँ अफरसहितको अभियान घोषणा गरेको छ ।

बैंकले सो अवसरमा आकर्षक स्मार्टफोन र अन्य आकर्षक पुरस्कारहरू जित्न सकिने अफर ल्याएको हो । यो अभियान पुस १० देखि माघ १० सम्म सीमित रहनेछ ।

सो अभियानमार्फत बैंकले आफ्ना ग्राहकहरूलाई आकर्षक पुरस्कार र बोनस प्रदान गरेर आफ्नो विशेष दिनलाई उनीहरूसँग मनाउने उद्देश्य लिएको छ।

उक्त अभियान सञ्चालन अवधिभित्र, बैंकको मोबाइल बैंकिङ्गमा नयाँ दर्ता गर्ने दुई जना भाग्यशाली विजेताहरूलाई नयाँ स्मार्टफोन प्रदान गर्नेछ ।

साथै, बैंकको मोबाइल बैंकिङ्ग एप प्रयोग गरेर ५०० रुपैयाँ वा सोभन्दा बढीको मोबाइल टपअप गर्ने ग्राहकहरू मध्ये एक सय जना भाग्यशाली विजेताहरूलाई १०० रुपैयाँको टपअप बोनस प्रदान गरिनेछ।

यो अभियान ग्राहकहरूप्रति आफ्नो कृतज्ञता व्यक्त गर्न र उनीहरूको बैंकिङ अनुभवलाई थप उत्साहजनक बनाउनको लागि ल्याएको बैंकले जनाएको छ ।

अभियानका विस्तृत नियम र शर्तहरूका लागि राष्ट्रिय वाणिज्य बैंकको आधिकारिक वेबसाइट र सामाजिक सञ्जाल प्लेटफर्महरूमा जानकारी उपलब्ध गराइनेछ।