भारतले हटायो फलाम निर्यातको अतिरिक्त कर: नेपालमा पनि फलाम र छड सस्तिने
वि.सं.२०७९ मंसिर ७ बुधवार
काठमाडौं । भारतले ६ महिनाअघि न्यून गुणस्तरको कच्चा फलाम निर्यातमा लगाएको अतिरिक्त कर हटाएको छ ।
यस्तो कर इण्टरमिडियट स्टील अर्थात् कुनै निश्चित वस्तु नबनाइएको स्टील निर्यातमा पनि लगाइएको थियो ।
फलामको मात्रा ५८ प्रतिशतभन्दा कम भएको धातु ‘आइरन ओर लम्प्स’ र मध्येवर्ती स्टील ‘फाइन्स’को निकासीमा लगाइएको ५० प्रतिशत अतिरिक्त कर शनिबारदेखि नै हटाइएको छ ।
भारत सरकारले ६ महिनाअघि नै अन्य किसिमका फलाम निर्यातमा समेत ५० प्रतिशत कर लगाएको थियो, जुन अब ३० प्रतिशतमा झारिएको छ ।
स्वदेशी बजारमा कच्चा फलामको उपलब्धता बढाएर मूल्य नियन्त्रण गर्न भन्दै भारतले निर्यातमा कर बढाएको थियो ।
यसले भारतबाटै कच्चा फलाम आयात गरेर बेच्ने नेपालजस्ता बजारमा बढी प्रभाव परेको थियो ।
उता, भारतमै पनि निर्यात ब्यापारमा ठूलो गिरावट आएको थियो । यो वर्ष भारतको फलाम निकासी पोहोरको तुलनामा आधा भन्दा पनि कम भएको तथ्यांक सार्वजनिक गरेको थियो ।
यही कारण भारतका प्रमुख स्टील उत्पादक कम्पनीहरुले सरकारलाई यस्तो अतिरिक्त कर घटाउन दवाव दिइरहेका थिए ।
महँगि र मन्दीउन्मुख भएकाले अहिले अन्तरराष्ट्रिय बजारमा फलामाको माग ब्यापक घटेको आँकडा आइरहेका छन् ।
यस्तो बेला सरकारले कर कटौति गरे पनि यसले निर्यात बढाउनेमा भारतका खानि उद्योगिहरुको संस्थाले शंका जनाएको छ ।
तर कर कटौति गर्ने भारतको निर्णयले नेपाली बजारलाई भने सहुलियत मिल्ने छ । नेपाली फलाम उद्योगीले सस्तोमा कच्चा पदार्थ किन्न पाउने छन् ।
नेपालमा पनि रड तथा फलामको माग बढ्न नसकेकाले यस्ता वस्तुको मूल्य सस्तिने संभावना बलियो बनेको छ ।
प्रकाशित समय : १३:४६ बजे