काठमाडौँ। सरकारी लगानी अर्थात नेपाल टेलिकम र राष्ट्रिय बाणिज्य बैंकको संयुक्त लगानीमा नयाँ डिजिटल पेमेन्ट कम्पनी सञ्चालनमा आएको छ । नेपाल डिजिटल पेमेन्ट्स कम्पनीले आजदेखि सेवा आरम्भ गर्न लागेको हो ।

कम्पनीका प्रमुख कार्यकारी अधिकृत कृष्ण भण्डारीले नमस्ते पेका नामबाट नेपाल डिजिटल पेमेन्ट्स कम्पनीले सेवा सञ्चालन गर्न लागेको बताए ।

यो सेवा पनि अन्य डिजिटल पेमेन्ट सेवाका माध्यमहरु जसरी नै प्लेस्टोर र एप स्टोरबाट ‘नमस्ते पे’ डाउनलोड गरेर सेवा लिन सकिने छ । पहिलो चरणमा दुरसञ्चार सेवा प्रादयकहरुको रिचार्ज, विद्युत र खानेपानीको बिल तथा केहि बैंकहरुको रकम प्रयोग गर्न सकिन्छ । ‘मंगलबार ब्राण्ड र सेवाको आरम्भ गर्दैछौं, मूलत सरकारी सेवाहरुलाई डिजिटल बनाउनका लागि कम्पनीको भूमिका अग्रणी रहनेछ ।

कम्पनीमा एक अर्ब अधिकृत पुँजी रहने छ भने चुक्ता पुँजी ४० करोड रुपैयाँ छ । कम्पनीमा टेलिकमले २५ करोड र बाणिज्य बैंकले १५ करोड रुपैयाँ लगानी गरेका छन् । कम्पनीले २०७७ चैत ४ गते सेवा सञ्चालनका लागि नेपाल राष्ट्र बैंकबाट लाइसेन्स प्राप्त गरिसकेको भण्डारीको भनाई छ ।

यसमा नेपाल टेलिकमको मोबाइल नम्बरलाई नै डिजिटल वालेटको रुपमा प्रयोग गर्न सकिने सुबिधा छ । टेलिकमले अन्य भुक्तानी सेवा प्रदायकभन्दा फरक यूएसएसडी अर्थात मोबाइलमा अंक डायल गरी बिना इन्टरनेट भुक्तानी सेवा सञ्चालन गर्नेछ ।

मोबाइल एप्स, क्यूआर कोडलगायतका अन्य सेवा पनि यसमा रहनेछन् । नमस्ते पेमा स्मार्टफोन प्रयोग नगर्ने उपभोक्ताले पनि डिजिटल कारोबार गर्न सक्ने नेपाल टेलिकमका प्रबन्ध निर्देशक डिल्ली अधिकारीले बताए ।

कम्पनीले कालान्तरमा सर्वसाधारणलाई आईपीओ जारी गर्ने योजनासहित कम्पनीको रोडम्याप तयार पारेको पनि प्रबन्ध निर्देशक अधिकारीले जानकारी दिए । ‘हामीले कालान्तरमा आईपीओ जारी गर्ने सोँचसहित कम्पनीको संरचना तयार पारेका छौं’, प्रबन्ध निर्देशक अधिकारीले भने ।
डिजिटल पेमेन्ट कम्पनीको लागि सरकारी लगानीमा यो कम्पनी पहिलो हो ।
२०७८ भदौ २९ गते प्रकाशित