राष्ट्रबैंकको इतिहासमा पहिलोपटक महिला डेपुटी गभर्नर
वि.सं.२०७७ फागुन २६ बुधवार
काठमाडौं , २६ फागुन – नेपाल राष्ट्र बैंकले ६५ वर्षको इतिहासमा पहिलोपटक महिला डेपुटी गभर्नर पाएको छ ।
मंगलबार बसेको मन्त्रिपरिषद् बैठकले नीलम ढुंगाना (तिम्सिना) र बमबहादुर मिश्रलाई रिक्त डेपुटी गभर्नर पदमा नियुक्त गरेसँगै ढुंगाना राष्ट्रबैंकको यो तहसम्म पुग्ने पहिलो महिला बनेकी हुन् ।
चिन्तामणि सिवाकोटी र शिवराज श्रेष्ठ पाँचवर्षे कार्यकाल पूरा गरी १८ फागुनमा सेवानिवृत्त भएसँगै डेपुटी गभर्नन पद रिक्त भएको थियो ।
नवनियुक्त डेपुटी गभर्नर ढुंगाना यसअघि सार्वजनिक ऋण व्यवस्थापन विभाग र मिश्र विदेशी विनिमय व्यवस्थापन विभागको प्रमुख कार्यकारी निर्देशक थिए ।
नेपाल राष्ट्र बैंक ऐन, २०५८ अनुसार राष्ट्र बैंकमा कार्यरत कार्यकारी निर्देशकहरुमध्येबाट २ जनालाई गभर्नरको सिफारिसमा मन्त्रिपरिषदले डेपुटी गभर्नरमा नियुक्त गर्नुपर्छ । राष्ट्र बैंकमा रहेका १७ जना कार्यकारी निर्देशकमध्ये ६ जनालाई प्रतिस्पर्धीका रुपमा हेरिएको थियो ।
प्रकाशित समय : ०४:४० बजे
