काठमाडाैं । निर्जीवन बीमा क्षेत्रमा आक्रामक बजार विस्तार गरिरहेको सानिमा जीआईसी इन्स्योरेन्सले गत आर्थिक वर्ष २०८२/८३ मा आफ्नो खुद बीमा शुल्क आर्जन, बीमा कोष र पूँजीमा उत्साहजनक प्रगति हासिल गरेको छ।

कम्पनीले सार्वजनिक गरेको चौथो त्रैमासको अपरिष्कृत वित्तीय विवरण अनुसार कम्पनीका आधारभूत र दीर्घकालीन महत्वका सूचकहरू बलिया बन्दै गएका छन्। असार मसान्तसम्म कम्पनीको मुख्य व्यवसाय अर्थात् खुद बीमा शुल्क (नेट प्रिमियम) आर्जन ९ प्रतिशतले बढेर ८३ करोड ३० लाख रुपैयाँ पुगेको छ।

यसैगरी, कम्पनीको बीमा कोष पनि ६.२७ प्रतिशतले बढेर ४ अर्ब ३६ करोड १९ लाख रुपैयाँको मजबुत अवस्थामा पुगेको छ भने चुक्ता पुँजी ५ प्रतिशतले वृद्धि भई २ अर्ब २५ करोड ७५ लाख रुपैयाँ कायम भएको छ।

व्यवसाय र कोषको आकार बढेसँगै कम्पनीको महाविपत्ति जगेडा १४.१५ प्रतिशतले बढेर ५ करोड २४ लाख रुपैयाँ पुगेको छ।

यद्यपि, मुख्य व्यवसायमा वृद्धि देखिए पनि कम्पनीको खुद नाफामा भने उच्च गिरावट आएको छ। अघिल्लो वर्षको असार मसान्तसम्म ३३ करोड ६७ लाख रुपैयाँ खुद नाफा कमाएको कम्पनीको नाफा यस वर्ष ६१.३९ प्रतिशतले घटेर १३ करोड ३९ हजार रुपैयाँमा सीमित भएको छ।

नाफा घट्नुमा मुख्यतया दाबी भुक्तानीमा आएको उच्च वृद्धि र लगानी आम्दानीमा आएको संकुचन प्रमुख कारण देखिएको छ। यस अवधिमा कम्पनीको कुल दाबी भुक्तानी ५४.४४ प्रतिशतले ह्वात्तै बढेर १ अर्ब ७९ करोड ७१ लाख रुपैयाँ पुगेको छ।

त्यस्तै, लगानीबाट हुने आम्दानी ३५.१८ प्रतिशतले ओरालो लागेर ११ करोड २ लाख रुपैयाँ कायम भएको छ भने कुल खर्च २५.९० प्रतिशतले वृद्धि हुँदै १ अर्ब २४ करोड ४६ लाख रुपैयाँ पुगेको छ।

नाफा घटेसँगै कम्पनीको सञ्चित मुनाफा ४२.८३ प्रतिशतले घटेर ९ करोड ८७ लाख रुपैयाँमा खुम्चिएको छ। यसको प्रत्यक्ष असर प्रतिसेयर आम्दानी (इपीएस) मा परेको छ। अघिल्लो वर्ष १५.६६ रुपैयाँ रहेको इपीएस समीक्षा अवधिमा घटेर ५.७७ रुपैयाँ कायम भएको छ। यस्तै, कम्पनीको प्रतिसेयर नेटवर्थ १४७.३३ रुपैयाँ रहेको छ भने यस अवधिमा कम्पनीले कुल १ लाख ४३ हजार २८ वटा बीमालेख जारी गरेको छ।