मुगु । छिमेकी मुगुसँग जोडिएका हुम्ला र बाजुरा जिल्लाको सीमा विवादको अवस्था चर्किँदै जाँदा त्यसको असर मुगुमा परेको छ ।

बाजुराको हिमाली युवा क्लबले कर्णाली कोरिडोर अनिश्चितकाका लागि बन्द गर्ने घोषणा गरेपछि मुगुको सोरु गाउँपालिका, खत्याड गाउँपालिका स्थानीयलाई सवारी आवतजावत र पूर्वाधार तथा विकास निर्माणका सामाग्रीहरू ढुवानीमा समस्या साथै रारा र हुम्ला, मुगु घुम्न आउने पर्यटहरुलाई पनि समस्या परेको छ ।

हिमाली गाउँपालिका–३ लाम्पाटामा भएको प्रहरी चौकी स्थापना गर्ने घटना सम्बन्धी सहमति कार्यान्वयन नभएको भन्दै जेठ १० गते कर्णाली राजमार्ग (कोरिडोर) पूर्ण रूपमा बन्द गरिएको थियो ।

वैशाख ८ गते हिमाली युवा क्लब, हिमाली गाउँपालिकाका राजनीतिक दल, जिल्ला प्रशासन कार्यालय, जिल्ला प्रहरी कार्यालय र सशस्त्र प्रहरी बलबिच २४ घण्टाका लागि आन्दोलन स्थगित गर्ने सहमति भएको थियो ।

तर, सहमति अनुसार मागहरू कार्यान्वयन नभएको र स्थानीय माथि भएका चोरी सिकारी लुटपाट तथा तोडफोड घटनाको निष्पक्ष छानबिन अघि नबढेको आरोप लगाइएको छ । घटनाको सत्य तथ्य छानबिन गरी दोषीलाई कानुनी दायरामा ल्याउन, पीडितलाई क्षतिपूर्ति उपलब्ध गराउन तथा घाइतेको उपचार खर्चको व्यवस्था गर्न माग गरेको छ ।

विवादका कारण मुगुको सोरु र खत्याड गाउँपालिकाका स्थानीयलाई अन्तर जिल्ला पुग्न सवारी साधन आवतजावतमा समस्या, खाद्यान्न तरकारी सामग्री ढुवानी र मुगुका दुई स्थानीय सरकारका कामकाज विकास, असार महिनाको अन्तिम तिर पूर्वाधारका सामग्री ढुवानी तथा आयत निर्यात गर्न समस्या उत्पन्न भएको सोरु गाउँपालिकाका अध्यक्ष धर्म बहादुर शाहीले बताए ।

अध्यक्ष शाहीका अनुसार असार मसान्तको समय नजिकिँदै गर्दा आयोजनाका कार्यलाई सम्पन्न गर्न हार्डवेयरका सामानलगायत अन्य क्षेत्रका कोणबाट पनि समस्या भएको अध्यक्ष शाहीको भनाई छ ।

कर्णाली कोरिडोर बन्द भएसँगै बाजुरा–हुम्ला मात्रै नभएर मुगुलाई आवतजावतमा प्रभावित भएको छ । आन्दोलनरत पक्षले सरकार, राजनीतिक दल, सञ्चारमाध्यम र नागरिक समाजलाई पीडितको न्यायका पक्षमा उभिन आग्रह गरेको छ ।

उता बाजुराका सहायक प्रमुख जिल्ला अधिकारी लक्ष्मण पुडासैनीका अनुसार प्रहरी चौकी स्थापना गर्न हुम्ला र बाजुराका स्थानीय बिच विवाद उत्पन्न भएको थियो ।

विवादकै बिच बाजुराका स्थानीयले कर्णाली कोरिडोर अनिश्चित कालिन बन्द भएको घटनाले नागरिकमा पर्न गएको समस्यालाई मध्यनजर गर्दै अन्य घटनाहरूको कानुनी प्रक्रिया भइरहेको छ भने सडक खुलाउने प्रक्रिया अगाडि बढेको बाजुराका सहायक प्रजिअ पुडासैनीको भनाई छ ।