काठमाडौँ । लमजुङमा आगामी असोज पहिलो सातादेखि चार मेगावाट बिजुली थप हुने भएको छ । दोर्दी गाउँपालिका–७ र ८ को सिमानामा माथिल्लो छ्याङ्दीखोला साना जलविद्युत् आयोजना निर्माण सम्पन्न भएसँगै राष्ट्रिय प्रसारण लाइनमा जोडिने भएको हो ।

आयोजनाका प्रमुख कार्यकारी अधिकृत एलबी थापाले उत्पादन परीक्षण भइसकेकाले असोज पहिलो सातादेखि राष्ट्रिय प्रशारण लाइनमा जोडिने बतएका हुन् । उनले भने, “असोज पहिलो सातादेखि नै बिजुली उत्पादन हुन्छ ।”

विसं २०७७ साउनमा सम्पन्न गर्ने लक्ष्यका साथ आयोजनाको काम थालिएको थियो । यद्यपी कोरोना सङ्क्रमणका कारण आयोजना एक वर्ष ढिला सकिएसँगै विजुली उत्पादन सुरु भएको हो ।

प्रबद्र्धक कम्पनी छ्याङ्दी हाइड्रोपावरले ८० करोड ३५ लाखको लागतमा बिजुली उत्पादन भएको जनाएको छ । सो आयोजनामा बैंक अफ काठमाडौँ र कुमारी बैंकको ७५ प्रतिशत ऋण रहेको छ । आयोजनाको बाँधस्थलबाट सर्जट्याङसम्म दुई हजार ८७४ मिटर हेडरेस र सर्जट्याङबाट एक हजार ३५६ मिटर पेनस्टक पाइपबाट विद्युत् गृहमा पानी फालिएको छ । यहाँबाट उत्पादित बिजुली उदिपुर सवस्टेशनमा जोडिने छ ।

आयोजनाले २०७४ असार २२ गते नेपाल विद्युत् प्राधिकरणसँग पिपिए सम्झौता गरेको थियो । सो सम्झौता अनुसार बर्खायाममा प्रतियुनिट मूल्य चार रुपैयाँ ८० पैसा र हिउँदमा प्रतियुनिट आठ रुपैयाँ ४० पैसा तोकिएको छ ।

२०७८ भदौ २८ गते प्रकाशित