काठमाडौँ । नेपाल विद्युत प्राधिकरणको कार्यकारी निर्देशकमा कुलमान घिसिङको नियुक्ति विरुद्ध निवर्तमान कार्यकारी निर्देशक हितेन्द्रदेव शाक्यले सर्वोच्च अदालतमा दायर गरेको रिट माथि आज सुनुवाई हुने भएको छ ।

प्रधानन्यायधीश चोलेन्द्र समशेर जबराको इजलाशले उक्त रिटको सुनुवाई गर्न लागेको हो ।

शाक्यले गत सोमबार सरकारले आफुलाई अन्यायपूर्ण तरिकाले हटाएको भन्दै सर्वोच्च अदालतमा रिट दायर गरेका थिए ।

उनले रिटमा प्राधिकरणको कार्यकारी निर्देशक पदमा कुलमान घिसिङलाई ४ वर्षको लागि गरिएको नियुक्ति बदर गर्न र सो पदमा आफु ४ वर्षको लागि नियुक्त भएकोले आफुलाई निरन्तरता दिनको लागि अन्तरिम आदेश माग गरेका छन् ।

आफूलाई हटाएको आधिकारिक पत्र नपाएको र सरकारले आफूलाई हटाएर कुलमानलाई ल्याउँदा संविधान सम्मत अधिकार हनन भएको उनले उल्लेख गरेका छन् । उनले आफुलाई सो पदमा पुनर्बहाली गर्न पनि आदेशको माग गरेका छन् ।

यस अघि यस मुद्दाको पेशी गत बुधबार तोकिएकोमा बेन्च बस्न नभ्याएपछि स्थगित भएको थियो । उक्त रिटको पेशी न्यायधीश कुमार रेग्मीको एकल इजलाशमा तोकिएको थियो ।तर न्यायधीश रेग्मीको बेन्च अर्का न्यायधीश सपना मल्ल प्रधानसंग संयुक्त इजलाशमा पनि तोकिएको थियो ।

न्यायधीश रेग्मीलाई एकल इजलाश र संयुक्त इजलाश पनि तोकिएकोले उनले एकल इजलाशको बेन्च बस्न नभ्याएका हुन् । न्यायाधीश रेग्मीको एकल इजलाशमा तोकिएको कुनै पनि मुद्दामा त्यस दिन सुनुवाई भएन । आज भने प्रधानन्याधिश जबराको एकल इजलाशमा यो मुद्दा दोस्रो नम्बर मै रहेकोले सुनुवाई हुने सम्भावना अधिक छ ।

२०७८ भदौँ ८ गते प्रकाशित